മികച്ച വിളയ്ക്ക് നിലമൊരുക്കല് പ്രധാനമാണ്. നമ്മുടെ നാട്ടില് പരിചിതമായിരുന്ന, ഇപ്പോഴും ചിലയിടത്തെങ്കിലും പരിചിതമായി തുടരുന്ന നെല് കൃഷിയുടെ കാര്യമെടുക്കാം. നല്ല കര്ഷകരൊക്കെ, മഴ എത്തുമ്പോഴേക്കും നിലമുഴുത് മറിച്ചിട്ടുണ്ടാകും. ഇളകിയ മണ്ണില് മഴ വീഴുന്നതോടെ തൊടിയിലെ പാഴ്മരങ്ങളുടെ തലപ്പ് വെട്ടി കണ്ടത്തിലിടും. ഒപ്പം മണ്ണിന്റെ സ്വഭാവത്തിന് അനുസരിച്ച് ചാരമോ ചാണകമോ വിതറും. ഒന്നോ രണ്ടോ ദിനം കൊണ്ട് മരത്തലപ്പ് അഴുകിത്തുടങ്ങും. അതോടെ വീണ്ടും ഉഴുത് നിലമൊരുക്കല് പൂര്ത്തിയാക്കും. വിത്തിറക്കാനോ ഞാറ് പറിച്ചു നടാനോ പാകത്തില്, മഴക്കിടെ തെളിയുന്ന വെയിലില് നിലമങ്ങനെ തിളങ്ങി നില്ക്കുന്നത് ഒരു കാഴ്ചയാണ്. അടുത്ത കൊയ്ത്തിലെ വിളയെക്കുറിച്ചുള്ള കര്ഷകന്റെ പ്രതീക്ഷ ഈ തിളക്കത്തില് പ്രതിഫലിക്കും. ആ തിളക്കം നോക്കി നില്ക്കുന്ന കര്ഷകന്റെ മുഖത്ത് വലിയ വെളിച്ചമുണ്ടാകും - വരാന് പോകുന്ന വിളവിന്റെ വലുപ്പത്തെക്കുറിച്ച്, അതിലൂടെ തനിക്കും കുടുംബത്തിനുമുണ്ടാകാന് പോകുന്ന സമൃദ്ധിയെക്കുറിച്ചുമൊക്കെയുള്ള പ്രതീക്ഷയുടെ വെളിച്ചം.
നൂറുമേനി കൊയ്ത കണക്കെടുത്താല് നരേന്ദ്ര മോഡി ഒരു നല്ല കര്ഷകനാണ്. വളപ്പിലെ പാഴ്മരങ്ങളെന്ന് അദ്ദേഹത്തിന് തോന്നിയവയുടെ തലപ്പ് വെട്ടി കണ്ടത്തിലിട്ട്, അഴുകിച്ച് നിലമൊരുക്കിയ കര്ഷകന്. 2002ല് നടത്തിയ നിലമൊരുക്കലിന്റെ ഫലം, നെറ്റിയില് വിയര്പ്പിറ്റാതെ, പിന്നീട് ഓരോ അഞ്ച് വര്ഷത്തിന് ശേഷവും കൊയ്ത് ഗുജറാത്തിന്റെ പത്തായം നിറച്ചയാള്. പരീക്ഷണക്കൃഷി വിജയിച്ചാല് അത് വ്യാപിപ്പിക്കണമെന്ന ചിന്ത ഓരോ കര്ഷകനിലുമുണ്ടാകുക സ്വാഭാവികം. അതിനുള്ള ശ്രമത്തിലാണ് നരേന്ദ്ര മോഡി. നിലമൊരുക്കാനുള്ള ജോലി, കരാര് നല്കിയിരിക്കുന്നുവെന്ന് മാത്രം. ഇന്ത്യന് നാഷനല് കോണ്ഗ്രസ് (ഇന്ദിരാ ഗാന്ധി) തുടക്കമിട്ട സാമ്പത്തിക പരിഷ്കാരങ്ങളുടെ ഭാഗമായ കരാര് സമ്പ്രദായം ബി ജെ പിയും സര്വാത്മനാ അംഗീകരിക്കുന്നുവെന്നതിനാല് നയപരമായ വിയോജിപ്പ് ഇക്കാര്യത്തിലില്ല താനും. വിസ്താരമേറിയ നിലമായതിനാല് പല കൂട്ടര്ക്ക് കരാര് നല്കേണ്ടി വരിക സ്വാഭാവികം. അതിലൊരു കൂട്ടര്ക്ക് നല്കിയ കരാറുകളുടെ നടത്തിപ്പിലൊന്നായിരുന്നു പരിക്രമ യാത്ര. രാഷ്ട്രീയത്തില് നല്ല വിളവുണ്ടാക്കാന് രുധിരത്തിന്റെ പശിമ, ഗുണം ചെയ്യുമെന്ന് നല്ലതു പോലെ അറിയാവുന്നവരാണ് ഇതിന്റെ നടത്തിപ്പുകാര്. 1990ല് എല് കെ അദ്വാനി നടത്തിയ ആദ്യ രഥയാത്രയുടെ പശ്ചാത്തലത്തില് അവര് അത് പരീക്ഷിച്ചു. 2002ല് കുറേക്കൂടി ഫലപ്രദമായി, ഗുജറാത്തില് പരീക്ഷിച്ചപ്പോള് അതിന്റെ ചുക്കാന് പിടിച്ചു.
ഇക്കുറി പരിക്രമ യാത്രയെന്ന പേരില് പരീക്ഷണത്തിന് തുടക്കമിട്ടപ്പോള് അത് തുടക്കത്തിലേ പാളി. ഉത്തര് പ്രദേശിലെ അഖിലേഷ് യാദവ് സര്ക്കാറിന്റെ പോലീസ് സന്നാഹമല്ല, മറിച്ച് ഹിന്ദു സന്ന്യാസിമാര് തന്നെയാണ് വിശ്വ ഹിന്ദു പരിഷത്തിനെ ഉപയോഗിച്ചുള്ള നീക്കത്തിന് തിരിച്ചടി നല്കിയത്. പരിക്രമ യാത്ര എല്ലാ വര്ഷവും നടക്കുന്നതാണെന്നും രാഷ്ട്രീയ നേട്ടമുണ്ടാക്കാനായി വി എച്ച് പി ശ്രമിച്ചത് ഉചിതമായില്ലെന്നും സന്ന്യാസിമാര് തുറന്നു പറഞ്ഞു. ചൈത്ര പൂര്ണിമ മുതല് വൈശാഖ നവമി വരെ എക്കാലവും നടക്കാറുള്ള യാത്രയെ രാഷ്ട്രീയ മുതലെടുപ്പിന് ഉപയോഗിക്കാന് വി എച്ച് പി ശ്രമിച്ചുവെന്ന് തുറന്ന് പറയുന്നവരില് വി എച്ച് പിയുടെ മുന് സെക്രട്ടറിയും സരയുകുഞ്ജ് ക്ഷേത്രത്തിലെ പുരോഹിതനുമായ മഹന്ത് ജുഗല് കിഷോര് ശരണ് ശാസ്ത്രിയെപ്പോലുള്ളവരുമുണ്ട്. 20 വര്ഷത്തിനിടെ അയോധ്യയില് വി എച്ച് പിയുടെ സ്വാധീനം ഇല്ലാതായെന്നും മഹന്തുമാര് തുറന്നു പറഞ്ഞു.
വി എച്ച് പിക്ക് വലിയ സ്വാധീനശക്തി രാജ്യത്ത് ഒരിടത്തുമുണ്ടായിരുന്നില്ല. ബി ജെ പിയടക്കം സംഘ് പരിവാര് സംഘടനകളാകെച്ചേരുമ്പോഴാണ് സ്വാധീനമുണ്ടായിരുന്നത്. വര്ഗീയതയെ ഉണര്ത്തി, ആസുരാത്മകമായി വളര്ത്തി സ്വാധീനം വലുതാക്കാന് ശ്രമം നടന്നു. അതിന്റെ മറ്റൊരു പതിപ്പിനുള്ള ശ്രമം പരാജയപ്പെടുമ്പോള് സംഘ് പരിവാറിന്റെ സ്വാധീന ശക്തി കുറഞ്ഞുവെന്ന് തന്നെയാണ് അര്ഥം. ചുരുങ്ങിയത്, അയോധ്യയില് രാമക്ഷേത്രം നിര്മിക്കുക എന്ന മുദ്രാവാക്യമുയര്ത്തി, ഭൂരിപക്ഷ വര്ഗീയതയെ വളര്ത്തിയെടുക്കാനുള്ള ത്രാണിയെങ്കിലും നഷ്ടമായിയെന്ന്. ബഹു വംശങ്ങളുടെ യൂനിയനായി വിഭാവനം ചെയ്തിരിക്കുന്ന ഇന്ത്യയെ സംബന്ധിച്ച് അത് പോലും ആശ്വാസകരമാണ്.
പരിക്രമ യാത്രയുടെ മറവിലുള്ള ശ്രമം പരാജപ്പെട്ടത്, പുതിയ പരീക്ഷണങ്ങള്ക്ക് പ്രേരകമായേക്കാം എന്ന അപകടം മുന്നിലുണ്ട്. ബി ജെ പിയുടെ നേതൃത്വത്തിലുള്ള മുന്നണിയുടെ പ്രധാനമന്ത്രി സ്ഥാനാര്ഥിയാകാന് നരേന്ദ്ര മോഡി ശ്രമം തുടങ്ങിയത് മുതല് ഇത്തരം ശ്രമങ്ങള് നടക്കുന്നുവെന്നതാണ് വസ്തുത. നരേന്ദ്ര മോഡി നേരിട്ട് അയോധ്യയിലെത്തി, സന്ന്യാസിമാരെയും സംഘ്പരിവാര നേതാക്കളെയും അഭിസംബോധന ചെയ്യാനായിരുന്നു ആദ്യത്തെ പദ്ധതി. വികസനത്തിന്റെ അപ്പോസ്തലന് എന്ന പ്രതിച്ഛായ സ്വീകരിക്കുന്നതാണ് ഘടക കക്ഷികളുടെ പിന്തുണ ലഭിക്കാന് നന്നെന്ന് തോന്നിയതിനാല് ഈ പദ്ധതിയില് നിന്ന് മോഡി പിന്മാറി. പകരം വ്യാജ ഏറ്റുമുട്ടലുകളുള്പ്പെടെ പല കേസുകളിലും ആരോപണവിധേയ സ്ഥാനത്തുള്ള, നൃശംസതക്ക് മടിയില്ലാത്തയാളെന്ന ഖ്യാതിയുള്ള അമിത് ഷായെ ഉത്തര് പ്രദേശിന്റെ ചുമതലയുള്ള ജനറല് സെക്രട്ടറിയാക്കി, അയോധ്യയിലെ അഭിസംബോധനാ പരിപാടിക്ക് പറഞ്ഞുവിട്ടു. രാമക്ഷേത്ര നിര്മാണത്തില് നിന്ന് പിന്നാക്കമില്ലെന്ന് ആവര്ത്തിച്ച്, അമിത് ഷാ മടങ്ങി. സഖ്യത്തില് നിന്ന് ജനതാദള് (യുനൈറ്റഡ്) പിന്മാറുന്നതിന്റെ വേഗം കൂട്ടിയെന്നല്ലാതെ മറ്റൊന്നും അമിത് ഷായുടെ പ്രസ്താവന മൂലമുണ്ടായില്ല. അതിന് ശേഷമുള്ള രണ്ടാമത്തെ നീക്കമായിരുന്നു പരിക്രമ യാത്ര.
പരിക്രമമെന്നാല് ചുറ്റിനടത്തം, ക്രീഡാ സഞ്ചാരം, പിന്തുടര്ച്ച എന്നൊക്കെയാണ് അര്ഥം.
1990കള്ക്കൊരു പിന്തുടര്ച്ചയുണ്ടാക്കുകയായിരുന്നു ഉദ്ദേശ്യം. പല കൂട്ടങ്ങളായി ചുറ്റിനടന്ന് അയോധ്യയില് സംഗമിക്കുക, അവിടെയൊരു ക്രമസമാധാന പ്രശ്നമുണ്ടാക്കാന് ശ്രമിക്കുക, അത് സാധ്യമായാല് ഭൂരിപക്ഷ വര്ഗീയതയുടെ ഏകീകരണത്തിന് വഴിയൊരുങ്ങും. അതൊക്കെയായിരുന്നു പ്രതീക്ഷകള്. പക്ഷേ, വിശ്വഹിന്ദു പരിഷത്ത് നേതാക്കളെ കരുതലായി അറസ്റ്റ് ചെയ്ത്, ക്രമസമാധാനം പാലിക്കാന് അഖിലേഷ് യാദവ് സര്ക്കാര് മിടുക്ക് കാട്ടി. സംഘ് പരിവാര് നേതാക്കളുടെ ഉറപ്പ് വിശ്വസിച്ച്, കര്സേവാ കാലത്ത് പ്രാര്ഥനാ മുറിയില് മൗനമവലംബിച്ചിരുന്ന കോണ്ഗ്രസ് നേതാവാകാന് അഖിലേഷ് യാദവ് തയ്യാറായില്ല. ബാബരി മസ്ജിദ് നിലംപരിശായ വാര്ത്തയറിഞ്ഞപ്പോള് 'സംഘ് നേതാക്കള് ഉറപ്പ് ലംഘിച്ചതിന് ഞാനെന്ത് ചെയ്യാനാണ'് എന്ന് ചോദിച്ച് കൈകഴുകിയ രീതിയല്ല തന്റെത് എന്ന് തെളിയിക്കുകയും ചെയ്തു.
ഭൂരിപക്ഷ വോട്ടുകള് എതിരാകുന്നത് വരും തിരഞ്ഞെടുപ്പില് സമാജ്വാദി പാര്ട്ടിക്ക് ചെറിയ തോതിലെങ്കിലും ദോഷമാകുമെന്ന് അറിയാത്തവരല്ല മുലായം സിംഗ് യാദവും മകന് അഖിലേഷ് യാദവും. വര്ഗീയ ധ്രുവീകരണം സൃഷ്ടിക്കാനും ക്രമസമാധാന പ്രശ്നം സൃഷ്ടിച്ച് മുതലെടുക്കാനും നടക്കുന്ന ശ്രമങ്ങളെ ചെറുക്കുക എന്നതാണ് വലിയ ഉത്തരവാദിത്വമെന്ന് തീരുമാനിക്കുമ്പോള് അതാണ് യഥാര്ഥ രാഷ്ട്രതന്ത്രജ്ഞത. ആ രാഷ്ട്രതന്ത്രജ്ഞത കാട്ടാതെ, ഭൂരിപക്ഷ സമുദായത്തെ പ്രീണിപ്പിച്ച് നിര്ത്താന് കോണ്ഗ്രസ് നേതൃത്വം ആയ കാലം മുതല് നടത്തിയ ശ്രമങ്ങളുടെ തുടര്ച്ചയാണ് രാമക്ഷേത്രത്തെച്ചൊല്ലിയുള്ള തര്ക്കവും ബാബരി മസ്ജിദിന്റെ തകര്ച്ചയും; എന്തിന,് ഇന്ന് കോണ്ഗ്രസിന്റെ അധികാരമോഹത്തിന് വെല്ലുവിളിയുയര്ത്തി നില്ക്കുന്ന ബി ജെ പിയെന്ന പാര്ട്ടിയും.
സ്വയംകൃതാനര്ഥത്താല് യു പി എ സര്ക്കാര് സമ്പന്നമായി നില്ക്കെ, 2014ലെ പൊതു തിരഞ്ഞെടുപ്പിലൊരു തിരിച്ചുവരവ് ബി ജെ പി പ്രതീക്ഷിക്കുന്നുണ്ട്. ആ പ്രതീക്ഷയിലാണ് നരേന്ദ്ര മോഡി പ്രധാനമന്ത്രി സ്ഥാനാര്ഥിയാകാന് കച്ചകെട്ടിയിറങ്ങിയിരിക്കുന്നത്. അതേ പ്രതീക്ഷയിലാണ് മോഡിയേക്കാള് വലിപ്പം തനിക്കുണ്ടെന്ന്, അയോധ്യാ രഥയാത്രയിലൂടെ വര്ഗീയ സംഘര്ഷത്തിന്റെ വിത്തെറിഞ്ഞ എല് കെ അഡ്വാനി പറയാതെ പറയുന്നത്. ഈ തര്ക്കത്തില് അഡ്വാനിക്കൊപ്പമുണ്ട്, സുഷമാ സ്വരാജിനെയും അരുണ് ജെയ്റ്റ്ലിയെയും പോലുള്ള നേതാക്കള്. അതുകൊണ്ട് തന്നെ സ്വന്തം ഭാഗം നേടിയെടുക്കാന്, പാര്ട്ടിക്കകത്തും വിയര്പ്പൊഴുക്കേണ്ടിവരുന്നുണ്ട് നരേന്ദ്ര മോഡിക്ക്. ഈ സാഹചര്യത്തില്, താന് നേതൃത്വത്തിലുണ്ടെങ്കില് വിജയസാധ്യത ഉറപ്പെന്ന് പാര്ട്ടിയെ ബോധ്യപ്പെടുത്താനുള്ള ദ്വിമുഖ തന്ത്രം. അതിന് നിലമൊരുക്കുകയാണ് ഈ കര്ഷകനെന്ന് തന്നെ കരുതണം.
വികസന അജന്ഡയെക്കുറിച്ചും സാമ്പത്തികമായി രാജ്യത്തെ മുന്നാക്കം കൊണ്ടുപോകാനുള്ള പദ്ധതികളെക്കുറിച്ചും മോഡി വാചാലമായി സംസാരിക്കും. കെട്ടിപ്പൊക്കിയ ഗുജറാത്തിന്റെ വികസന മാതൃക ചൂണ്ടിക്കാട്ടുകയും ചെയ്യും. മറുവശത്ത് അമിത് ഷായെപ്പോലുള്ള ഉറ്റ അനുയായികളോ വി എച്ച് പിയെപ്പോലുള്ള ശക്തികളോ അയോധ്യയുള്പ്പെടെ വര്ഗീയ ധ്രുവീകരണത്തിന് സാധ്യതയുള്ള വിഷയങ്ങള് സജീവമാക്കുകയും ചെയ്യും. അഡ്വാനി - മോഡി അധികാരത്തര്ക്കത്തില് ഭിന്നിച്ചു നില്ക്കുന്ന പാര്ട്ടി അണികളെ യോജിപ്പിക്കാനും ചില തീവ്ര വിഷയങ്ങള് അനിവാര്യമാണല്ലോ! ആര് എസ് എസ് നേതൃത്വത്തിന്റെ നല്ല സര്ട്ടിഫിക്കറ്റും പിന്തുണയുമുറപ്പാക്കാന് മോഡിക്ക് മുന്നില് ഇതിലും നല്ലൊരു വഴി വേറെയില്ല.
അതിന്റെ ചില സൂചനകള് ബീഹാറില് നിന്നുണ്ടായെന്നത് മറക്കാതിരിക്കുക. ബി ജെ പിയുടെ നേതൃത്വത്തിലുള്ള എന് ഡി എയില് നിന്ന് ജനതാദള് (യുനൈറ്റഡ്) പിന്മാറി ദിവസങ്ങള്ക്കകമാണ് നവാദയില് വര്ഗീയ സംഘര്ഷമുണ്ടായി കര്ഫ്യു പ്രഖ്യാപിക്കേണ്ടിവന്നത്. നിതീഷ്കുമാര് സര്ക്കാര് വലിയ ജാഗ്രത കാട്ടിയതുകൊണ്ട് രണ്ട് പേരുടെ മരണത്തില് കലാശിച്ച സംഘര്ഷം വ്യാപിച്ചില്ല. സംഘര്ഷം സൃഷ്ടിച്ചെടുക്കാന് ബോധപൂര്വമായ ശ്രമം നടന്നുവെന്ന ആരോപണം അന്ന് ഉയര്ന്നിരുന്നു. അയോധ്യക്ക് തിരി കൊളുത്താന് നടക്കുന്ന ശ്രമങ്ങള് ഫലം കാണാതെ വരുമ്പോള് പുതിയ സംഘര്ഷ മുഖങ്ങള് സൃഷ്ടിച്ചെടുക്കാന് ശ്രമങ്ങളുണ്ടാകാനുള്ള സാധ്യത ഏറെയാണ്.
ഗുജറാത്തില് അരങ്ങേറിയ വികസന പരീക്ഷണം രാജ്യത്താകെ വ്യാപിപ്പിക്കാന് നരേന്ദ്ര മോഡി ശ്രമിക്കുമ്പോള് പ്രത്യേകിച്ചും. ഒന്നിലേയുള്ളൂ ആശ്വാസം, വി പി സിംഗ് സര്ക്കാര് താഴെ വീണാലും അഡ്വാനിയെ അറസ്റ്റ് ചെയ്ത് രഥയാത്ര തടയാനുള്ള ഇച്ഛാശക്തി പ്രകടിപ്പിച്ച പഴയ ലാലുപ്രസാദ് യാദവിന്റെ മാതൃകകള് ചിലയിടത്തെങ്കിലുമുണ്ടാകുന്നുവെന്നതാണ്. അത്തരമൊരു ഇച്ഛാശക്തിയും രാഷ്ട്രതന്ത്രജ്ഞതയും പ്രകടിപ്പിക്കാത്ത ഒരേയൊരു പാര്ട്ടി പലപ്പോഴും കോണ്ഗ്രസാണ്. അതിന്റെ നേതൃത്വത്തിലുള്ള മുന്നണിയെയാണ് തങ്ങള് നേരിടുന്നത് എന്നതാണ് ബി ജെ പിക്കും നരേന്ദ്ര മോഡിക്കും കൂടുതല് ആത്മവിശ്വാസം നല്കുന്നതും. അതുകൊണ്ട് കൂടിയാണ് പണ്ട് അധികാരം വിളയിച്ച് നല്കിയ വിത്ത് വീണ്ടും വിതച്ച് നോക്കാന് അവര് നിലമൊരുക്കുന്നതും. അതിന് പാകത്തിലുള്ള കര്ഷകനെ കലപ്പ ഏല്പ്പിക്കുന്നതും.
No comments:
Post a Comment