2017-05-16

വെളുപ്പിക്കലിന്റെ മോദിമാര്‍ഗം


കള്ളപ്പണം, രാഷ്ട്രഭാഷയിലാണെങ്കില്‍ കാലാധന്‍, എന്ന് കേട്ടാല്‍ തിളയ്ക്കും ചോര. കള്ളപ്പണം ഇല്ലാതാക്കാന്‍ ഒറ്റക്കാലില്‍ തപമാണ്. ആ പേരിലുള്ളതൊക്കെ രാജ്യത്തെ കണക്ക് ബുക്കില്‍ രേഖപ്പെടുത്തപ്പെട്ടാല്‍ ആളൊന്നുക്ക് 15 ലക്ഷം രൂപ വീതം നല്‍കുമെന്ന് വരെ വാഗ്ദാനം ചെയ്തിരുന്നു. വാഗ്ദാനങ്ങള്‍ നടപ്പാക്കാനുള്ളതല്ലെന്ന് അറിയാമെങ്കിലും അമ്പത്തിയാറിഞ്ച് വീതിയുള്ള നെഞ്ചില്‍ നിന്നുള്ളതാകുമ്പോള്‍ നടന്നാലോ എന്ന വിദൂര വ്യാമോഹമുണ്ടായിരുന്നു ചിലര്‍ക്കെങ്കിലും. ആ വ്യാമോഹക്കാരാണ് കിട്ടിയില്ലല്ലോ 15 ലക്ഷം എന്ന് ഇടക്കിടെ മോഹഭംഗം കൊള്ളുന്നത്.


രാജ്യത്ത് കറന്‍സി ഇല്ലാതായാലും വേണ്ടില്ല, കള്ളപ്പണം ഇല്ലാതാക്കണം എന്ന ഉദ്ദേശ്യത്തിലാണ് ആയിരത്തിന്റെയും അഞ്ഞൂറിന്റെയും നോട്ടുകള്‍ ഒരു രാത്രിയില്‍ അസാധുവാക്കിയത്. അതോടെ കള്ളപ്പണക്കാരൊക്കെ പരിഭ്രമിച്ചുവെന്നും പണമൊന്നാകെ ബാങ്കുകളിലെത്തിച്ചുവെന്നും ആ ഇനത്തില്‍ സഹസ്ര കോടികള്‍ സര്‍ക്കാര്‍ ഖജനാവിലെത്തിയെന്നുമൊക്കെ പറയുന്നുണ്ട്. എന്നാല്‍ അസാധുവാക്കിയതില്‍ എത്ര ബാങ്കുകളില്‍ തിരിച്ചെത്തിയെന്നോ അതില്‍ അനധികൃത സ്വത്തായി കണ്ടെത്തിയത് എത്രയെന്നോ കള്ളനോട്ടുകള്‍ എത്രയുണ്ടായിരുന്നുവെന്നോ ഔദ്യോഗികമായി വെളിപ്പെടുത്തപ്പെട്ടില്ല. ഈ കണക്ക് വെളിപ്പെടുത്തുന്നത് രാജ്യസുരക്ഷയെ അതി ഗുരുതരമായി ബാധിക്കുമെന്നാണ് സര്‍ക്കാറിന്റെയും അതിന്റെ കീഴിലൊതുങ്ങിയ റിസര്‍വ് ബാങ്കിന്റെയും വാദം. ഇത്തരം കണക്കുകളില്‍ കൂടി അധിഷ്ഠിതമാണ് രാജ്യസുരക്ഷയെന്ന് തിരിച്ചറിഞ്ഞ ജനം ഇനി മേലാല്‍ ഇത്തരം കണക്കുകള്‍ ചോദിച്ച് ബുദ്ധിമുട്ടിക്കില്ലെന്ന് രാജ്യസ്‌നേഹാധിക്യത്താല്‍ സത്യവാങ്മൂലം നല്‍കിക്കഴിഞ്ഞിട്ടുണ്ട്. അതിന്റെ തെളിവാണല്ലോ ഉത്തര്‍ പ്രദേശിലും ഉത്തരാഖണ്ഡിലും മണിപ്പൂരിലുമൊക്കെ കണ്ടത്. അതിലല്‍പ്പം കുറവ് കണ്ടത് പഞ്ചാബില്‍ മാത്രമാണ്.


അരിയും തിന്ന് വീട്ടുകാരെയും കടിച്ചിട്ട് പിന്നെയും കള്ളപ്പണത്തോട് മുറുമുറുക്കുയാണ് സര്‍വാധികാര്യക്കാര്‍. കള്ളപ്പണം കാറ്റില്‍  മണത്താല്‍ ആരുടെയും അനുമതി കൂടാതെ പരിശോധനക്ക് ആദായ നികുതി വകുപ്പ് ഉദ്യോഗസ്ഥര്‍ക്ക് അനുമതി നല്‍കി നിയമം ഭേദഗതി ചെയ്ത്, സ്വകാര്യ കമ്പനികളുടെ സംഭരണികളിലേക്ക് ചോര്‍ത്തപ്പെട്ട ആധാറിനെ ആദായ നികുതിയുമായി കൂട്ടിയിണക്കിക്കൊണ്ട് ഒക്കെ. എല്ലാ പണവും കണക്കിലുണ്ടാകണം, കണക്കുകള്‍ രാജ്യത്ത് നിലവിലുള്ള നിയമങ്ങളിലെ വ്യവസ്ഥകള്‍ അനുസരിച്ചാകണം എന്നൊക്കെ നിര്‍ബന്ധമാണ്. അതിനാണ് ആധാറുമായൊക്കെ കൂട്ടിയിണക്കുന്നത്. ഏതാണ്ടെല്ലാ സ്വകാര്യ കമ്പനികളുടെയും സംഭരണികളില്‍ ആധാര്‍ വിവരങ്ങളുള്ളതിനാല്‍ അതിലേക്ക് ആദായ നികുതി കൂടി കൂട്ടിയിണക്കിയാല്‍ കമ്പനികള്‍ക്ക് കൂടുതല്‍ സൗകര്യമാകുമെന്നത് ഒരു ഉപോത്പന്നം മാത്രം.


നിയമം ലംഘിച്ചുള്ള സമ്പാദ്യമൊക്കെ 'കാലാ ധന്‍' ആണെന്നതില്‍ ഇനിയാര്‍ക്കെങ്കിലും സംശയമുണ്ടെങ്കില്‍ ആയത് സര്‍വാധികാര്യക്കാരോട് ട്വീറ്റ് മുഖാന്തിരം ഉന്നയിച്ച് നിവൃത്തി വരുത്താവുന്നതാണ്. വ്യക്തികള്‍, സംഘടനകള്‍, സ്ഥാപനങ്ങള്‍ ഒക്കെ പാലിക്കേണ്ട പരശ്ശതം നിയമങ്ങളുണ്ട്. അതിലൊന്നാണ് വിദേശ സ്ഥാപനങ്ങളില്‍ നിന്നുള്ള സംഭാവനകള്‍ നിയന്ത്രിക്കാന്‍ വ്യവസ്ഥ ചെയ്ത് 1976ല്‍ കൊണ്ടുവന്ന ഫോറിന്‍ കോണ്‍ട്രിബ്യൂഷന്‍ റെഗുലേഷന്‍ ആക്ട് (എഫ് സി ആര്‍ എ). രാഷ്ട്രീയ പാര്‍ട്ടികള്‍ വിദേശ ഫണ്ട് സ്വീകരിക്കുന്നത് തടഞ്ഞിട്ടുണ്ട് എഫ് സി ആര്‍ എയും ജനപ്രാതിനിധ്യ നിയമവും.


ഈ നിയമങ്ങള്‍ നിലനില്‍ക്കെയാണ് യൂണൈറ്റഡ് കിംഗ്ഡം കേന്ദ്രമായി പ്രവര്‍ത്തിക്കുന്ന വേദാന്ത എന്ന കമ്പനിയില്‍ നിന്ന് 2004 മുതല്‍ 2012 വരെയുള്ള കാലത്ത് ഭാരതീയ ജനതാ പാര്‍ട്ടിയും ഇന്ത്യന്‍ നാഷനല്‍ കോണ്‍ഗ്രസും (ഇന്ദിര) സംഭാവന വാങ്ങിയത്. വേദാന്തയില്‍ നിന്ന് നേരിട്ടല്ലെന്ന് വേണമെങ്കില്‍ പറയാം. ഭൂരിഭാഗം ഓഹരിയും വേദാന്ത കൈവശം വെക്കുന്ന സെസ ഗോവ, സ്റ്റെര്‍ലൈറ്റ് ഇന്‍ഡസ്ട്രീസ് ഇന്ത്യ എന്നീ കമ്പനികളില്‍ നിന്നായി എട്ട് കോടി നാല്‍പ്പത്തി രണ്ട് ലക്ഷം രൂപ ബി ജെ പിയും എട്ട് കോടി 79 ലക്ഷം രൂപ കോണ്‍ഗ്രസും സംഭാവനയായി സ്വീകരിച്ചു. നിലവിലുണ്ടായിരുന്ന നിയമമനുസരിച്ച് വിദേശ കമ്പനി ഭൂരിഭാഗം ഓഹരി കൈവശം വെക്കുന്ന കമ്പനികളെ വിദേശ കമ്പനികളായാണ് കണക്കാക്കുന്നത്. നിലനില്‍ക്കുന്ന നിയമ വ്യവസ്ഥ ലംഘിച്ച് സ്വീകരിക്കപ്പെട്ട പണം കള്ളപ്പണവും.


കള്ളപ്പണമെന്ന് കേട്ടാല്‍ തിളയ്ക്കുന്ന ചോര, ഇവിടെയും തിളയ്‌ക്കേണ്ടതാണ്. അങ്ങനെ തിളച്ചാല്‍ വേദാന്തയില്‍ നിന്ന് പണം സ്വീകരിച്ചത് നിയമ വിധേയമല്ലെന്ന ഡല്‍ഹി ഹൈക്കോടതി വിധിയനുസരിച്ചുള്ള നടപടിക്കുള്ള ഉത്തരവാദിത്തമുണ്ട് സര്‍വാധികാര്യക്കാര്‍ക്ക്. സെസ ഗോവയും, സ്റ്റെര്‍ലൈറ്റ് ഇന്‍ഡസ്ട്രീസും വിവിധ രാഷ്ട്രീയ പാര്‍ട്ടികള്‍ക്ക് നല്‍കിയ സംഭാവനകളെക്കുറിച്ചും ഇതുപോലുള്ള മറ്റ് കമ്പനികളില്‍ നിന്ന് രാഷ്ട്രീയ പാര്‍ട്ടികള്‍ സംഭാവന സ്വീകരിച്ചിട്ടുണ്ടോ എന്നതിനെക്കുറിച്ചും അന്വേഷിക്കാനുമാണ് സര്‍വാധികാര്യക്കാരുടെ കീഴില്‍ വരുന്ന ആഭ്യന്തര വകുപ്പിന്റെ കൈകാര്യ കര്‍ത്താവിനോട് ഡല്‍ഹി ഹൈക്കോടതി നിര്‍ദേശിച്ചത്. സംഭാവന സ്വീകരിക്കാന്‍ തീരുമാനിച്ച പാര്‍ട്ടി ഭാരവാഹികളെയും അതിന് വഴിയൊരുക്കിക്കൊടുത്തവരെയും മൂന്ന് വര്‍ഷം വരെ ജയിലില്‍ അടക്കുക എന്നതാണ് ആഭ്യന്തര വകുപ്പ് ചെയ്യേണ്ടത്. ഡല്‍ഹി ഹൈക്കോടതി വിധി ചോദ്യം ചെയ്ത് ബി ജെ പിയും കോണ്‍ഗ്രസും സുപ്രീം കോടതിയെ സമീപിച്ചെങ്കിലും വൈകാതെ ഹരജി പിന്‍വലിച്ചു. അപ്പീലിന്‍മേല്‍ മേല്‍ക്കോടതി തീരുമാനമെടുക്കും വരെ കാത്തിരിക്കേണ്ട ഗതികേട് ഈ കള്ളപ്പണക്കേസിലില്ല തന്നെ.


 പിന്നീട് സംഭവിച്ചത് സര്‍വാധികാര്യക്കാര്‍, കള്ളപ്പണത്തെക്കുറിച്ച് വികാരവിക്ഷുബ്ധമായ ശബ്ദത്തില്‍ പറഞ്ഞതിനൊക്കെ വിരുദ്ധമായതാണ്. സംഭവിക്കാന്‍ പോകുന്നതും അങ്ങനെ തന്നെ. അരിയും തിന്ന് വീട്ടുകാരെയും കടിച്ചിട്ടുള്ള മുറുമുറുപ്പൊന്നും ഇവിടെ കാണില്ല. നരേന്ദ്ര മോദി സര്‍ക്കാര്‍ എഫ് സി ആര്‍ എ ഭേദഗതി ചെയ്തു. വിദേശത്ത് ഉടലെടുത്ത കമ്പനികളില്‍ നിന്ന് സംഭാവന സ്വീകരിക്കാന്‍ സന്നദ്ധ സംഘടനകള്‍ക്ക് അനുവാദം നല്‍കിക്കൊണ്ടും വിദേശ കമ്പനിയുടെ നിര്‍വചനം മാറ്റിക്കൊണ്ടും. അമ്പത് ശതമാനത്തിലധികം വിദേശ നിക്ഷേപമുണ്ട് എന്നതുകൊണ്ട് വിദേശ കമ്പനിയാകില്ല എന്നായിരുന്നു ഭേദഗതി. ഇതിന് 2010 മുതല്‍ മുന്‍കാല പ്രാബല്യവും നല്‍കി. നിര്‍വചനം മാറ്റിയതോടെ സെസ ഗോവയില്‍ നിന്നും സ്റ്റെര്‍ലൈറ്റില്‍ നിന്നും വാങ്ങിയ സംഭാവന നിയമ വിധേയമാകുമെന്നായിരുന്നു പ്രതീക്ഷ. നിയമം ഭേദഗതി ചെയ്തപ്പോഴും ജനാധിപത്യവിരുദ്ധത മുഖമുദ്രയായുണ്ടായിരുന്നു. എന്‍ ഡി എക്ക് ഭൂരിപക്ഷമില്ലാത്ത രാജ്യസഭയുടെ അംഗീകാരം വേണ്ടതില്ലാത്ത മണി ബില്ലായാണ് എഫ് സി ആര്‍ എ ഭേദഗതി കൊണ്ടുവന്നത്. ലോക്‌സഭ പാസ്സാക്കിയതോടെ അത് നിയമമായി.


ഇതൊക്കെയായിട്ടും പുലിവാല് തീര്‍ന്നില്ല. 2010 വരെ മാത്രം മുന്‍കാല പ്രാബല്യം നല്‍കിയപ്പോള്‍ 2004 മുതല്‍ 2009 വരെ സ്വീകരിച്ച സംഭാവനകള്‍ നിയമവിരുദ്ധമായി (കള്ളപ്പണമായി) തുടര്‍ന്നു. അത് കൂടി ഇല്ലാതാക്കുന്നതിന് എഫ് സി ആര്‍ എ ഭേദഗതിക്ക് 2004 മുതലുള്ള മുന്‍കാല പ്രാബല്യം നല്‍കാന്‍ ബില്ല് കൊണ്ടുവരാനുള്ള ശ്രമത്തിലാണ്. അതും മണി ബില്ലായി കൊണ്ടുവന്ന് പാസ്സാക്കിയെടുക്കുമെന്നുറപ്പ്. പണമിടപാടുകള്‍ കൈകാര്യം ചെയ്യുന്ന ഏത് ബില്ലും മണി ബില്ലായി നിര്‍വചിക്കാന്‍ സര്‍ക്കാറിന് സാധിക്കും. ലോക് സഭാ സ്പീക്കര്‍ അംഗീകരിച്ചാല്‍ മതിയാകും. ആ സൗകര്യം പ്രയോജനപ്പെടുത്തി കള്ളപ്പണം വെളുപ്പിക്കുന്നതിന് സര്‍വാധികാര്യക്കാര്‍ അനുവാദം നല്‍കുമ്പോള്‍ നോട്ട് നിരോധിച്ച്, നികുതിയെ ആധാറുമായി ബന്ധിപ്പിച്ച് ഒക്കെ കള്ളപ്പണത്തോട് പടവെട്ടുന്നതിലെ ആത്മാര്‍ഥത ചോദ്യംചെയ്യപ്പെടുമോ? പ്രതിസ്ഥാനത്തുള്ളതിനാല്‍ കോണ്‍ഗ്രസ് ചോദ്യം ചെയ്യില്ലെന്ന് ഉറപ്പ്. മറ്റ് പാര്‍ട്ടികള്‍ക്കും ജനത്തിനും കഥയില്‍ ചോദ്യമില്ലെന്നാണ് ന്യായം.  നിയമവ്യവസ്ഥകള്‍ ലംഘിച്ച് വിദേശത്തു നിന്ന് പണം സ്വീകരിച്ചുവെന്ന കുറ്റം ചുമത്തി അംഗീകാരം റദ്ദാക്കിയ സര്‍ക്കാറിതര സന്നദ്ധ സംഘടനകള്‍ക്കും ചോദ്യമുന്നയിക്കാന്‍ അവകാശമില്ല. കാരണം രാജ്യസ്‌നേഹത്തില്‍ അധിഷ്ഠിതമായ (കള്ള)പണമിടപാടും അതില്ലാത്ത ഇടപാടും തമ്മില്‍ ഭേദമുണ്ട്.


നിരോധിച്ച നോട്ടുകള്‍ നിശ്ചിത എണ്ണത്തിലധികം കൈവശം വെച്ചാല്‍, കണക്ക് കാണിക്കാന്‍ സാധിക്കാത്തതുകൊണ്ട് കൈവശം വെച്ചത് കള്ളപ്പണമാണെന്ന് കണക്കാക്കി ശിക്ഷ വിധിക്കുമെന്ന് 130 കോടി ജനങ്ങളെ ഭീഷണിപ്പെടുത്തിയ സര്‍വാധികാര്യക്കാരാണ്, സ്വന്തം പാര്‍ട്ടി കൈവശം വെച്ച കള്ളപ്പണം വെളുപ്പിച്ചെടുക്കാന്‍ നിയമഭേദഗതി വരുത്തുന്നത്, അതിന് കൂടുതല്‍ മുന്‍കാല പ്രാബല്യം നല്‍കാന്‍ വീണ്ടും ഭേദഗതിക്ക് ആലോചിക്കുന്നത്. അല്ലെങ്കിലും നിയമങ്ങളും അതിന്റെ വ്യാഖ്യാനങ്ങളുമൊക്കെ ജനത്തിനും അധികാരത്തെ സ്വാധീനിക്കാന്‍ ത്രാണിയില്ലാത്ത സ്ഥാപനങ്ങള്‍ക്കും മാത്രമേ ബാധകമായിട്ടുള്ളൂ. അതാണ് സ്വതന്ത്ര ഇന്ത്യന്‍ യൂണിയന്റെ ചരിത്രം. സര്‍വാധികാര്യക്കാരുടെ മാത്രം നിയന്ത്രണത്തിലേക്ക് ജനാധിപത്യ ഭരണ സംവിധാനം ചുരുങ്ങുമ്പോള്‍ നിയമവും അതിന്റെ വ്യാഖ്യാനങ്ങളും കൂടുതല്‍ ശക്തമായി ജനങ്ങളുടെ മേല്‍ പതിക്കും. അത് നടപ്പാക്കുന്ന സര്‍വാധികാര്യക്കാരും സംഘവും ഏത് നിയമ ലംഘനത്തെയും അതിജയിച്ച് നില്‍ക്കുകയും ചെയ്യും. ചെയ്യുന്നത് രാജ്യസ്‌നേഹികളാകുമ്പോള്‍ അതൊന്നും വലിയ വിഷയമേയല്ല.


ലക്ഷക്കണക്കിന് കോടിയുടെ കള്ളപ്പണം രാജ്യത്ത് തിരിച്ചെത്തിച്ച് ആളൊന്നുക്ക് 15 ലക്ഷം വീതം വിതരണം ചെയ്യാന്‍ തയ്യാറെടുക്കുന്ന സര്‍വാധികാര്യക്കാര്‍, സ്വന്തം പാര്‍ട്ടി നേരിടുന്ന ചെറിയ ആധി നിവര്‍ത്തിക്കാന്‍ ഒരു നിയമം മാറ്റിയാല്‍ അതിനെ സര്‍വാത്മനാ പിന്തുണക്കുക എന്നതാണ് രാജ്യസ്‌നേഹികളുടെ കര്‍ത്തവ്യം. സാഷ്ടാംഗം നമസ്‌കരിക്കുകയും ആകാം.


സംഭാവന നല്‍കിയ വേദാന്തയും ചെറിയ കക്ഷിയല്ല. ഒഡീഷയിലെ നിയാംഗിരി കുന്നുകള്‍ ഇടിച്ച് ബോക്‌സൈറ്റ് ഖനനം ആരംഭിക്കാന്‍ 50,000 കോടി രൂപയുടെ പദ്ധതി തയ്യാറാക്കി കാത്തിരുന്നവരാണ്. നിയാംഗിരിയില്‍ പാര്‍ക്കുന്ന, 'ആര്‍ക്കും വേണ്ടാത്ത' ആദിവാസികളുടെ പേരിലാണ് ആ പദ്ധതി തുലാസിലായത്. അവിടുത്തെ പന്ത്രണ്ട് ഗ്രാമസഭകളും പദ്ധതിയെ എതിര്‍ത്തു. ഒരു കൈകൊണ്ട് സ്വീകരിച്ച സംഭാവന മറുകൈ അറിയരുതെന്ന് നിര്‍ബന്ധമുള്ള കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി, യു പി എ സര്‍ക്കാറിന്റെ കാലത്ത് പദ്ധതിയെ എതിര്‍ത്ത്  രംഗത്തുവന്നിരുന്നു. ചതിയില്‍ വഞ്ചന കാട്ടുന്ന ഈ രീതി സര്‍വാധികാര്യക്കാര്‍ക്കില്ല, അദ്ദേഹത്തിന്റെ പാര്‍ട്ടിക്കുമില്ല. നിയമഭേദഗതിയിലൂടെ മുന്‍കാലത്ത് ലഭിച്ചതൊക്കെ വെളുപ്പിക്കുകയും കൂടുതല്‍ സ്വീകരിക്കാന്‍ വഴി തുറക്കുകയും ചെയ്തിട്ടുണ്ട്.


രാജ്യമാകെ വികസിപ്പിക്കാന്‍ തത്രപ്പെട്ട് നില്‍ക്കുമ്പോള്‍ നിയാംഗിരിയെ മാറ്റി നിര്‍ത്താനാകില്ല. ആകയാല്‍ വേദാന്ത ഇനിയും നല്‍കാനിരിക്കുന്ന സംഭാവനകള്‍ സ്വീകരിക്കുകയും ബോക്‌സൈറ്റ് ഖനന പദ്ധതി പുനരുജ്ജീവിപ്പിക്കുകയും ചെയ്യാം. എതിര്‍ക്കാന്‍ നില്‍ക്കുന്ന ആദിവാസികളെ എങ്ങനെ കൈകാര്യം ചെയ്യണമെന്നതിന് ഗുജറാത്ത് മാതൃകയായുമുണ്ട്.
കള്ളപ്പണമില്ലാതാക്കുക എന്ന ലക്ഷ്യത്തോടെ ഒറ്റക്കാലില്‍ നടത്തുന്ന തപം സര്‍വാധികാര്യക്കാര്‍ പഞ്ചാഗ്നി മധ്യത്തിലേക്ക് മാറ്റും. അതില്‍ വിട്ടുവീഴ്ചയില്ല. നിയമം മാറിയതിലൂടെ പാര്‍ട്ടി ഫണ്ടിലേക്ക് സംഭാവന കൂടുതല്‍ ഒഴുകിയാല്‍ അതിലെ കറുപ്പും വെളുപ്പും തിരിക്കാനാവില്ല. അതൊരു സ്വാഭാവിക ഒഴുക്കുമാത്രം.

2017-05-06

തലയുടെ കല്ല് ഇളകിയവര്‍!!


''ഈ ഓഫീസില്‍ നിന്ന് ഇറങ്ങുന്നതിന് മുമ്പ്, വിങ്ങുന്ന ഹൃദയത്തോടെ ഒരു കാര്യം പറയാതെ വയ്യ. ഭരണഘടനാ പദവിയിലിരിക്കുന്നയാളെങ്കിലും എന്റെ ഭാഗം വിശദീകരിക്കാനുള്ള ന്യായമായ അവസരം ജഡ്ജിമാരുടെ അന്വേഷണ കമ്മീഷന്‍ നല്‍കിയില്ല'' - സിക്കിം ഹൈക്കോടതിയുടെ ചീഫ് ജസ്റ്റിസായിരിക്കെ നീതിന്യായ സര്‍വീസില്‍ നിന്ന് രാജിവെച്ച് രാഷ്ട്രപതിയായിരുന്ന പ്രതിഭാ പാട്ടീലിന് നല്‍കിയ കത്തില്‍ ജസ്റ്റിസ് പി ഡി ദിനകരന്‍ കുറിച്ച വാക്യങ്ങളാണിവ. കത്ത് ഇങ്ങനെ തുടരുന്നു - ''സാമൂഹികമായി അടിച്ചമര്‍ത്തപ്പെട്ട, കുറഞ്ഞ അവകാശങ്ങള്‍ മാത്രമുള്ള സമുദായത്തില്‍ ജനിച്ചതാണോ എന്റെ ദൗര്‍ഭാഗ്യത്തിന് കാരണമെന്ന സംശയം എനിക്കുണ്ട്. ഉയര്‍ന്ന പദവികളിലെത്തുന്ന ഈ സമുദായാംഗങ്ങളുടെ സത്യസന്ധത ഒരടിസ്ഥാനവുമില്ലാതെ ചോദ്യം ചെയ്യുക പതിവാണ്. കെട്ടുകഥകള്‍ സൃഷ്ടിച്ച് അപകീര്‍ത്തിപ്പെടുത്തുകയാണ് രീതി. വരേണ്യ വിഭാഗക്കാരെ നിക്ഷിപ്ത താത്പര്യങ്ങളോടെ സ്വീകരിക്കുകയും എല്ലാ നന്മകളുടെയും അവതാരങ്ങളായി ചിത്രീകരിക്കുകയും ചെയ്യും''


നിയമവിരുദ്ധമായി ഭൂമി വാങ്ങിക്കൂട്ടി, സര്‍ക്കാര്‍ ഭൂമി കൈയേറി, വരവില്‍കവിഞ്ഞ് സ്വത്ത് സമ്പാദിച്ചു തുടങ്ങിയ ആരോപണങ്ങളെത്തുടര്‍ന്ന് പാര്‍ലിമെന്റ് ഇംപീച്ച്‌മെന്റ് നടപടികള്‍ ആരംഭിച്ച ഘട്ടത്തിലാണ് ജസ്റ്റിസ് പി ഡി ദിനകരന്‍ രാജിവെക്കുന്നത്. ഇംപീച്ച്‌മെന്റ് നടപടികളുടെ ഭാഗമായി നിയോഗിക്കപ്പെട്ട ജഡ്ജിമാരുടെ അന്വേഷണ കമ്മീഷന്‍, ദിനകരനെതിരെ ഉന്നയിക്കപ്പെട്ട ആരോപണങ്ങളൊക്കെ കഴമ്പുള്ളതാണെന്ന് കണ്ടെത്തിയിരുന്നു. ആ കമ്മീഷനു മുമ്പാകെ തന്റെ ഭാഗം വിശദീകരിക്കാന്‍ മതിയായ അവസരം ലഭിച്ചില്ലെന്നാണ് രാജിക്കത്തില്‍ ദിനകരന്‍ ചൂണ്ടിക്കാട്ടിയത്.


ദളിതനായ പി ഡി ദിനകരന്‍ ദീര്‍ഘകാലം മദ്രാസ് ഹൈക്കോടതിയില്‍ ജഡ്ജിയായിരുന്നു. പിന്നീട് കര്‍ണാടക ഹൈക്കോടതിയുടെ ചീഫ് ജസ്റ്റിസും. സുപ്രീം കോടതി ജഡ്ജിയായി നിയമിക്കുന്നതിന് കൊളീജിയം ജസ്റ്റിസ് ദിനകരന്റെ പേര് ശിപാര്‍ശ ചെയ്തതിന് പിറകെയാണ് ആരോപണങ്ങളുടെ കുത്തൊഴുക്കുണ്ടായത്. ചെന്നൈ ആസ്ഥാനമായ ഒരു സംഘടന ജസ്റ്റിസ് ദിനകരനെതിരായ ആരോപണങ്ങളുടെ പട്ടിക നിരത്തിക്കൊണ്ട് അന്ന് സുപ്രീം കോടതി ചീഫ് ജസ്റ്റിസായിരുന്ന കെ ജി ബാലകൃഷ്ണനും രാഷ്ട്രപതിക്കും പ്രധാനമന്ത്രിക്കുമൊക്കെ പരാതി നല്‍കി. അഴിമതി ആരോപണം നേരിടുന്ന ചീഫ് ജസ്റ്റിസിനെതിരെ കര്‍ണാടക ഹൈക്കോടതിയിലെ അഭിഭാഷകരും രംഗത്തെത്തി. സ്വാര്‍ഥ ലാഭങ്ങള്‍ക്കായി ജൂഡീഷ്യല്‍ പദവി ദുരുപയോഗം ചെയ്യുന്നുവെന്ന് അഭിഭാഷകര്‍ ആരോപിച്ചു. ഇതേത്തുടര്‍ന്ന് സുപ്രീം കോടതി ജഡ്ജിയായി സ്ഥാനക്കയറ്റം നല്‍കാനുള്ള ശിപാര്‍ശ മരവിപ്പിച്ചു, സിക്കിം ഹൈക്കോടതിയിലേക്ക് ദിനകരനെ സ്ഥലം മാറ്റുകയും ചെയ്തു. അതിന് പിറകെയാണ് ഇംപീച്ച്‌മെന്റ് നടപടികള്‍ ആരംഭിച്ചത്.


ദീര്‍ഘകാലത്തെ ജുഡീഷ്യല്‍ സര്‍വീസിനിടെ ഉയരാത്ത ആരോപണങ്ങള്‍ സുപ്രീം കോടതിയിലേക്ക് സ്ഥാനക്കയറ്റം ലഭിക്കുമെന്ന ഘട്ടമെത്തിയപ്പോള്‍ എന്തുകൊണ്ട് ഉയര്‍ന്നുവെന്ന സംശയം ചീഫ് ജസ്റ്റിസായിരുന്ന കെ ജി ബാലകൃഷ്ണന്‍ അന്ന് ഉന്നയിച്ചിരുന്നു. പിന്നീട് അന്വേഷണ റിപ്പോര്‍ട്ടുകളെ മുഖവിലക്കെടുത്ത്, ദിനകരനെ സുപ്രീം കോടതി ജഡ്ജിയാക്കാന്‍ ശിപാര്‍ശ ചെയ്ത കൊളീജിയത്തിന് തെറ്റുപറ്റിയെന്ന് കെ ജി ബാലകൃഷ്ണന്‍ തിരുത്തുകയും ചെയ്തു. ദിനകരനും ഡോക്ടറായ ഭാര്യയും വരുമാനത്തിലധികം സ്വത്ത് സമ്പാദിച്ചുവെന്ന് ആരോപിച്ച് 29 പരാതികളാണ് രജിസ്റ്റര്‍ ചെയ്യപ്പെട്ടത്. ഇവയൊക്കെ ആദായനികുതി അപ്പലേറ്റ് ട്രൈബ്യൂണല്‍ തള്ളിക്കളഞ്ഞു. വരുമാന സ്രോതസ്സ് കൃത്യമാണെന്നും വരുമാനത്തിന് ആനുപാതികമായ നികുതി ഒടുക്കിയിട്ടുണ്ടെന്നും ട്രൈബ്യൂണല്‍ വ്യക്തമാക്കുകയും ചെയ്തു. സര്‍ക്കാര്‍ ഭൂമി കൈയേറി, നിയമവിരുദ്ധമായി ഭൂസ്വത്ത് കൈവശം വെച്ചു എന്നീ ആരോപണങ്ങളില്‍ എന്തെങ്കിലും നടപടിയുണ്ടായതായി അറിവില്ല.


ദളിതനായതുകൊണ്ട് വേട്ടയാടപ്പെട്ടതാണോ ജസ്റ്റിസ് പി ഡി ദിനകരന്‍? ദളിതന് സുപ്രീം കോടതി ജഡ്ജിയായി സ്ഥാനക്കയറ്റം ലഭിക്കുന്നത് തടയാന്‍ മനഃപൂര്‍വം കെട്ടിച്ചമച്ചതായിരുന്നോ ഈ ആരോപണങ്ങള്‍? ആരോപണങ്ങളില്‍ പലതും കഴമ്പില്ലാത്തതെന്ന് തെളിഞ്ഞപ്പോള്‍ ദിനകരനോട് അനീതി ചെയ്‌തോ എന്ന ചോദ്യം നീതിന്യായ സംവിധാനത്തിന്റെ ഒരു വേദിയിലും ഉയര്‍ന്നില്ല. ഇംപീച്ച്‌മെന്റിന് നടപടി ആരംഭിച്ച രാജ്യസഭയോ ഇംപീച്ച്‌മെന്റിന് നേട്ടീസ് നല്‍കിയ 70 അംഗങ്ങളില്‍ ഒരാള്‍ പോലുമോ ചെയ്തത് അനീതിയായോ എന്ന് ആലോചിച്ചതേയില്ല. വിമര്‍ശവും സ്വയം വിമര്‍ശവും തെറ്റുതിരുത്തലുമൊക്കെ അജണ്ടയാക്കിയ പാര്‍ട്ടികളുടെ പ്രതിനിധികളും ഈ നോട്ടീസ് നല്‍കിയവരില്‍ ഉണ്ടായിരുന്നു. അവരിലുമുണ്ടായില്ല പുനരാലോചന.


ഈ സാഹചര്യത്തില്‍ വേണം നിലവില്‍ കൊല്‍ക്കത്ത ഹൈക്കോടതി ജഡ്ജിയായ ജസ്റ്റിസ് സി എസ് കര്‍ണനും നീതിന്യായ സംവിധാനവുമായുള്ള സര്‍വസീമകളെയും ലംഘിച്ചുള്ള തര്‍ക്കത്തെ കാണാന്‍. അധികാരപരിധി ലംഘിച്ച്, തലയുടെ കല്ല് ലേശം ഇളകിയിട്ടുണ്ടോ എന്ന സംശയം ആരിലും ജനിപ്പിക്കും വിധത്തിലുള്ള പെരുമാറ്റം ജസ്റ്റിസ് കര്‍ണന്റെ ഭാഗത്തുനിന്നുണ്ടായിട്ടുണ്ട്. സുപ്രീം കോടതിയുടെ ഉത്തരവ് കീഴ്‌ക്കോടതി ജഡ്ജിയായിരിക്കെ സ്റ്റേ ചെയ്യുക, സുപ്രീം കോടതി ജഡ്ജിമാര്‍ക്ക് സമന്‍സ് അയക്കുക, അവര്‍ക്കുമേല്‍ കുറ്റം ചുമത്തി, യാത്രാ വിലക്ക് ഏര്‍പ്പെടുത്തുക തുടങ്ങിയവയൊക്കെ നിലനില്‍ക്കുന്ന നീതിന്യായ അധികാര ശ്രേണി കണക്കിലെടുക്കുമ്പോള്‍ അസ്വാഭാവിക നടപടികളാണ്. എന്തുകൊണ്ട് ഈ അസ്വാഭാവികത എന്ന ചോദ്യത്തിന് ഉത്തരം തേടുന്നതിന് പകരം നമ്മുടെ നീതിന്യായ സംവിധാനം ജസ്റ്റിസ് കര്‍ണനെ പ്രതിസ്ഥാനത്തു നിര്‍ത്താനാണ് ശ്രമിച്ചത് എന്നതും വലിയ അസ്വാഭാവികതയാണ്.


മദ്രാസ് ഹൈക്കോടതിയില്‍ ജഡ്ജിയായിരിക്കെ ജാതി വിവേചനത്തിന് ഇരയായെന്നാണ് ദലിതനായ ജസ്റ്റിസ് കര്‍ണന്റെ പരാതി. പ്രധാനപ്പെട്ട കേസുകളൊന്നും തന്റെ പരിഗണനക്ക് വിടാതിരുന്നത് താഴ്ന്ന ജാതിക്കാരനായതുകൊണ്ടാണെന്ന് ജസ്റ്റിസ് കര്‍ണന്‍ പരാതിപ്പെട്ടിരുന്നു. ഇവ്വിധമുള്ള വിവേചനം ഉണ്ടായിട്ടുണ്ടോ എന്ന് പരിശോധിക്കേണ്ട ഉത്തരവാദിത്തം നമ്മുടെ നീതിന്യായ സംവിധാനത്തിനുണ്ട്. ന്യായാന്യായങ്ങള്‍ വിചാരിച്ച് തീര്‍പ്പുകല്‍പ്പിക്കാന്‍ ചുമതലപ്പെട്ട, സ്വതന്ത്രമായി നീതിനിര്‍വഹണം നടത്തുന്നുവെന്ന് വിശ്വസിക്കപ്പെടുന്ന സംവിധാനം തന്നെ കൊടിയ അനീതി നടമാടുന്ന ഇടമായി തുടരുന്നുണ്ടോ എന്ന പരിശോധന നീതി നിര്‍വഹണത്തില്‍ പ്രധാനമാണ്. അതുണ്ടാകാതിരുന്നത് എന്തുകൊണ്ടെന്ന്, ജസ്റ്റിസ് കര്‍ണന്റെ മനോനില പരിശോധിക്കാന്‍ ഉത്തരവിടും മുമ്പ് സുപ്രീം കോടതി പറയേണ്ടതുണ്ട്? രാജ്യത്തു നിന്ന് തുടച്ചുനീക്കപ്പെടേണ്ട അയിത്താചരണം നീതിന്യായ സംവിധാനത്തില്‍ നിലനില്‍ക്കുന്നുവെന്ന് ജുഡീഷ്യല്‍ സംവിധാനത്തിന്റെ ഭാഗമായിരിക്കുന്ന ഒരാള്‍ തന്നെ പരാതിപ്പെടുമ്പോള്‍ അത് പരിശോധിക്കേണ്ടതില്ല എന്ന് തീരുമാനിക്കുന്നവരുടെ മനോനിലയെ കാര്യമായി സംശയിക്കേണ്ടതുണ്ട്. അത് തലയുടെ കല്ല് ഇളകിപ്പോയോ എന്ന സംശയമല്ല മറിച്ച്, ജാതിയില്‍ താണവന്റെ പരാതി പരിഗണിക്കുക പോലും വേണ്ടെന്ന സ്ഥിതി നിലനിന്ന് കാണണമെന്ന ക്രിമിനല്‍ മനസ്സാണ്.


മദ്രാസ് ഹൈക്കോടതിയിലെ സഹ ജഡ്ജിമാരില്‍ ചിലര്‍ അഴിമതിക്കാരാണെന്നതായിരുന്നു ജസ്റ്റിസ് കര്‍ണന്റെ രണ്ടാമത്തെ പരാതി. സുപ്രീം കോടതിയില്‍ നിന്ന് വിരമിച്ചവരും ഇപ്പോള്‍ സര്‍വീസിലുള്ളവരുമടക്കം 20 ജഡ്ജിമാര്‍ അഴിമതിക്കാരാണെന്ന് കര്‍ണന്‍ പിന്നീട് ആരോപിച്ചു. ജുഡീഷ്യറിക്കുള്ളിലെ അഴിമതിയെക്കുറിച്ച് അതിന്റെ ഉള്ളില്‍ നിന്ന് തന്നെ ആരോപണമുണ്ടായാല്‍ പേരിനൊരു അന്വേഷണം നടത്തേണ്ട ഉത്തരവാദിത്തമില്ലേ ന്യായാസനങ്ങള്‍ക്ക്? മുന്‍ നിയമമന്ത്രിയും നിയമജ്ഞനുമായ ശാന്തിഭൂഷണും സുപ്രീം കോടതിയിലെ മുന്‍ ജഡ്ജി മാര്‍ക്കണ്ഡേയ കട്ജുവും ജഡ്ജിമാര്‍ അഴിമതിക്കാരാണെന്ന് ആരോപിച്ചപ്പോള്‍ കോടതിയലക്ഷ്യമെന്ന ആയുധമെടുക്കുകയാണ് സുപ്രീം കോടതി ചെയ്തത്. അലക്ഷ്യത്തോട് നേര്‍ക്കാന്‍ നില്‍ക്കാതെ ഇരുവരും പിന്മാറി. ജസ്റ്റിസ് കര്‍ണന്‍ ആരോപണമുന്നയിച്ചപ്പോഴും കോടതിയലക്ഷ്യത്തിന് നോട്ടീസയച്ചു സുപ്രീം കോടതി. കോടതിയലക്ഷ്യ നടപടി നേരിടുന്ന ആദ്യത്തെ സിറ്റിംഗ് ജഡ്ജിയായി ജസ്റ്റിസ് കര്‍ണന്‍ മാറുകയും ചെയ്തു.


ജുഡീഷ്യറിയില്‍ അഴിമതിയുണ്ടെന്ന് ആരോപിച്ചാല്‍ അതേക്കുറിച്ച് അന്വേഷിച്ച് നെല്ലും പതിരും വേര്‍തിരിക്കുക എന്നതാണ് മര്യാദ. അതിന് തയ്യാറാകാതിരിക്കുന്നതാണ് യഥാര്‍ഥ അലക്ഷ്യം. രാഷ്ട്രീയ നേതൃത്വത്തിന്റെ അഴിമതിയെക്കുറിച്ചുള്ള പരാതികള്‍ പരിഗണിക്കുമ്പോള്‍ വേണ്ടിടത്തും വേണ്ടാത്തിടത്തും മുള്ളും മുനയും വെച്ച് സംസാരിക്കാന്‍ മടികാട്ടാത്ത നീതിന്യായ സംവിധാനം സ്വന്തം നേര്‍ക്കുയര്‍ന്ന ആരോപണത്തിന് മുന്നില്‍ കോടതിയലക്ഷ്യത്തിന്റെ പ്രതിരോധം തീര്‍ക്കുമ്പോള്‍ ആരുടെ മനോനിലക്കാണ് യഥാര്‍ഥത്തില്‍ പ്രശ്‌നമെന്ന ചോദ്യം വീണ്ടുമുയരും.

ആരോപണത്തിന് ആധാരമെന്ത് എന്ന ചോദ്യം പോലും ഉയരാത്ത വിധത്തില്‍ കളങ്കരഹിതമായ യശോധാവള്യം നീതിന്യായ സംവിധാനം സ്വയം അവകാശപ്പെടുന്നുണ്ടോ? ഉണ്ടെങ്കില്‍ അതിലുള്ളത്ര അസ്വാഭാവികത ജസ്റ്റിസ് കര്‍ണന്റെ പെരുമാറ്റത്തിലുണ്ടോ എന്ന് വര്‍ണ്യത്തില്‍ ആശങ്കയുണ്ട്.
ചീഫ് ജസ്റ്റിസ് സ്ഥാനത്തു നിന്ന് വിങ്ങുന്ന ഹൃദയത്തോടെ രാജിവെച്ചിറങ്ങിയ പി ഡി ദിനകരന്‍, ചെയ്തത് നീതിയോ എന്ന ചോദ്യവുമായി നമ്മുടെ മുന്നിലുണ്ട്. തന്റെ ഭാഗം വിശദീകരിക്കാനുള്ള അവസരം ജഡ്ജിമാരുടെ കമ്മീഷന്‍ നല്‍കിയില്ലെന്ന ദിനകരന്റെ ആരോപണത്തിന് മറുപടിയുണ്ടായിട്ടുമില്ല. ഇതേ അവസ്ഥ ജസ്റ്റിസ് കര്‍ണനുമുണ്ട്. ജാതി വിവേചനം, നീതിന്യായ സംവിധാനത്തിലെ അഴിമതി തുടങ്ങിയ ആരോപണങ്ങളില്‍ ജസ്റ്റിസ് കര്‍ണന്റെ ഭാഗം കേള്‍ക്കാന്‍ തയ്യാറാകാതെ രാജ്യത്തെ ജനങ്ങള്‍ക്ക് മുന്നില്‍ അദ്ദേഹത്തെ മനോനില തകരാറിലായ വ്യക്തിയെന്ന് പരമോന്നതനീതി പീഠം ചിത്രീകരിക്കുമ്പോള്‍, സാമൂഹികമായി അടിച്ചമര്‍ത്തപ്പെട്ട, കുറഞ്ഞ അവകാശങ്ങള്‍ മാത്രമുള്ള സമുദായത്തില്‍ ജനിച്ചതാണോ ദൗര്‍ഭാഗ്യത്തിന് കാരണമെന്ന ദിനകരന്റെ സംശയം കര്‍ണന്റെ കാര്യത്തിലും പ്രസക്തമാകും.

2017-04-17

ഇടതിലമര്‍ന്ന്, വലതുവ്യതിയാനമൊഴിഞ്ഞ് വെട്ടി...


വിദ്യാര്‍പ്പണം പാത്രമറിഞ്ഞുവേണമെന്ന് വള്ളത്തോള്‍ നാരായണ മേനോന്‍ എഴുതിയൊഴിഞ്ഞിട്ട് ദശകങ്ങളായി. വിമര്‍ശം വസ്തുതയറിഞ്ഞുവേണമെന്നാണ് കോടിയേരി ബാലകൃഷ്ണന്റെ പാഠഭേദം. സി പി എമ്മിന്റെ സംസ്ഥാന സെക്രട്ടറി പദവിയില്‍ നടപ്പായ കോടിയേരി ബാലകൃഷ്ണന്‍ കവിയാണെന്ന ആക്ഷേപം എതിരാളികള്‍ പോലും ഉന്നയിച്ചിട്ടില്ല, ഇനിയൊട്ട് ഉന്നയിക്കാനും പോകുന്നില്ല. കവിയല്ലെങ്കിലും കാവ്യനീതിയെക്കുറിച്ച് ഗ്രാഹ്യമുണ്ട് അദ്ദേഹത്തിന്. ആഭ്യന്തരകലഹങ്ങളില്‍, പാര്‍ട്ടിയിലേതായാലും മുന്നണിയിലേതായാലും, ഒത്തുതീര്‍പ്പാണ് കോടിയേരിയുടെ വൃത്തം. അതിനനുസരിച്ചേയുണ്ടാകൂ ഭാഷയില്‍ അലങ്കാരം.


വെളിയം ഭാര്‍വനോളമോ സി കെ ചന്ദ്രപ്പനോളമോ ഇല്ല കാനം രാജേന്ദ്രനെന്നാണ് സി പി ഐക്കാര്‍ പോലും അടക്കം പറഞ്ഞിരുന്നത്.  താരതമ്യത്തില്‍ അര്‍ഥമില്ലെങ്കിലും പൂര്‍വസൂരികളോട് അങ്കത്തിന് ത്രാണിയുണ്ടെന്ന് അദ്ദേഹം തെളിയിക്കുകയാണ്. സി പി എമ്മിനോട് തുലനം ചെയ്താല്‍ ചെറുതായ പാര്‍ട്ടിയെ, പ്രസക്തി ചോദ്യംചെയ്യാന്‍ നെല്ലിട നല്‍കാതെ, വലുതാക്കി നിര്‍ത്തുകയാണ് കാനം. സര്‍ക്കാറിന്റെ ഭാഗമായി തുടരുമ്പോഴും പ്രതിപക്ഷധര്‍മം നിറവേറ്റുക എന്നതാണ് അതിനേറ്റം നല്ല വഴിയെന്ന അനുഭവപാഠം തുണ. പി കെ വാസുദേവന്‍ നായര്‍ മുഖ്യമന്ത്രി സ്ഥാനം രാജിവെച്ചിറങ്ങി ഇടത് ജനാധിപത്യ മുന്നണിയുണ്ടാക്കാനുളള കരാറിന്റെ ഭാഗമായ കാലം മുതലുള്ള അനുഭവങ്ങള്‍.


അതിനും മുമ്പ്, ഇന്ത്യാ മഹാരാജ്യം വിപ്ലവത്തിന് പരുവപ്പെട്ടോ എന്ന തര്‍ക്കം തീര്‍പ്പില്ലാതെ തുടരുന്ന കാലത്ത് രാജ്യത്തിനകത്തുള്ള ബൂര്‍ഷ്വാസിയെ എങ്ങനെ സമീപിക്കണമെന്നതില്‍ ഭിന്നാഭിപ്രായമുണ്ടായി. രാജ്യത്തിന് പുറത്തുള്ള ബൂര്‍ഷ്വാസിയെപ്പോലെ അകറ്റി നിര്‍ത്തേണ്ടവരല്ല രാജ്യത്തിനകത്തുള്ളവരെന്നും അവരെ സ്വാംശീകരിച്ച് മുന്നോട്ടുപോകുകയാണ് വേണ്ടതെന്നും ഒരു പക്ഷം. ഇന്ത്യന്‍ ബൂര്‍ഷ്വാസിയെ അംഗീകരിച്ചാല്‍ വിപ്ലവ സ്വഭാവത്തില്‍ വെള്ളം ചേര്‍ക്കലാകുമെന്ന് മറുപക്ഷം. യഥാര്‍ഥ കമ്യൂണിസ്റ്റ് മാതൃക സോവിയറ്റോ ചൈനീസോ എന്നതിലൊരു രാഷ്ട്രാന്തര തര്‍ക്കവും. ഇതില്‍ തീര്‍പ്പുണ്ടാകാതെ ഇന്ത്യന്‍ വിപ്ലവം മുന്നോട്ടുകൊണ്ടുപോകാനാകില്ലെന്ന നിലവന്നു. അന്യോന്യം മുറുകി. ഇന്ത്യന്‍ ബൂര്‍ഷ്വാസിയെ അകറ്റിനിര്‍ത്താന്‍ തീരുമാനിച്ചവര്‍ അവിഭക്ത കേന്ദ്ര  കമ്മിറ്റിയില്‍ നിന്ന് ഇറങ്ങിപ്പോന്ന് മാര്‍ക്‌സിസ്റ്റുകളായി സ്വയം പ്രഖ്യാപിച്ചു. വിപ്ലവ സ്വഭാവം കൂടുതല്‍ മാര്‍ക്‌സിസ്റ്റുകള്‍ക്കാണെന്ന് കുറച്ചധികം പേര്‍ക്ക് തോന്നിയതിനാല്‍ സി പി ഐ (എം) വലുതായി. ശിഷ്ടഭാഗത്തെ വലതു കമ്മ്യൂണിസ്റ്റെന്ന് മുദ്രകുത്തി. കോണ്‍ഗ്രസിനൊപ്പം നിന്ന്, 'ഇന്ത്യയാണ് ഇന്ദിര ഇന്ദിരയാണ് ഇന്ത്യ' എന്ന മുദ്രാവാക്യത്തില്‍ പുളകിതരായി അടിയന്തരാവസ്ഥയെ തുണച്ചതോടെ വലതനെന്ന പേര് ഉറച്ചു.


ആ (ദുഷ്)പേരൊന്ന് മാറ്റിയെടുക്കാന്‍ ഇക്കാലമത്രയും ശ്രമിച്ചത് ഫലശൂന്യമായിരുന്നു. ഒരിക്കല്‍ കൂടി ശ്രമിക്കുകയാണ് കാനം രാജേന്ദ്രന്‍, അല്‍പം കടുപ്പിച്ചുതന്നെ. അതുകൊണ്ടാണ് സി പി എം നേതൃത്വം നല്‍കുന്ന, അതില്‍ തന്നെ പ്രമാണിയായ പിണറായി വിജയന്‍ നയിക്കുന്ന സര്‍ക്കാറിന്റെ നയങ്ങളെ ഇടതുപക്ഷത്തു നിന്നാണ് എതിര്‍ക്കുന്നത് എന്ന് അദ്ദേഹം വാചാലനായത്. വലതെന്ന് ആക്ഷേപിക്കപ്പെടുന്നവര്‍ യഥാര്‍ഥ ഇടതാകുന്നതില്‍ വൈരുധ്യമുണ്ടോ അതില്‍ അധിഷ്ഠിതമായ ഭൗതികതയുണ്ടോ എന്നൊക്കെ സി പി എമ്മിന് പ്ലീനവശാല്‍ ഗണിക്കേണ്ടിവരും. രാജ്യം ഭരിക്കുന്ന സര്‍ക്കാറിന്റെ നയങ്ങള്‍ മാറ്റാന്‍ സംസ്ഥാന സര്‍ക്കാറുകള്‍ക്ക് അധികാരിമില്ലെന്നിരിക്കെ, രാജ്യാതിര്‍ത്തി നോക്കാതെ ബൂര്‍ഷ്വാസികളെ അംഗീകരിക്കേണ്ടിവരുന്നുവെന്ന ന്യായമുള്ളതിനാല്‍ അക്കാര്യത്തിലൊരു തര്‍ക്കം ഇനി ആവശ്യമില്ല. ഇടതില്‍ വലതുണ്ടോ, വലതിന് ഇടതാകാമോ എന്ന ചോദ്യങ്ങള്‍ ഉത്തരമര്‍ഹിക്കാത്തവയുമായി. എങ്കിലും ഇടതുപക്ഷം ഹൃദയപക്ഷമെന്നത് സി പി ഐക്ക് ചാര്‍ത്തിക്കൊടുക്കാനാകുമോ സി പി എമ്മിന്? ഇടതുപക്ഷം ചേര്‍ന്നുനിന്നെന്ന് അവകാശപ്പെട്ട് സി പി ഐ സംസ്ഥാന സെക്രട്ടറി നടത്തിയ വിമര്‍ശത്തിന് സി പി എം സംസ്ഥാന സെക്രട്ടറി ഒത്തുതീര്‍പ്പ് വൃത്തത്തില്‍ മറുപടി നല്‍കിയത് അതുകൊണ്ടാണ്. വസ്തുതയറിയാതെയുള്ള വിമര്‍ശം ഇടതുപക്ഷത്തിന് മുതലാളിത്തത്തേക്കാള്‍ വെറുപ്പുള്ള സംഗതിയാണ്. അതിനാല്‍ യഥാര്‍ഥ ഇടതുപക്ഷം സി പി എം തന്നെ!


മൂന്നാറിലും ഇടുക്കിയുടെ ഇതരഭാഗങ്ങളിലുമുള്ള കൈയേറ്റം ഒഴിപ്പിച്ചേ അടങ്ങൂവെന്നാണ് കാനത്തിന്റെ ശപഥം. അത് തടയാന്‍ ഇറങ്ങുന്നവര്‍ ഇടത് നയത്തിനൊപ്പമല്ലെന്നും. ഏതാണ്ടൊരു ദശകം മുമ്പ് മൂന്നാറില്‍ ജെ സി ബി ഇറങ്ങിയ കാലത്ത് മൂന്ന് സെന്റ് പട്ടയഭൂമിയും അതിന്റെ വിരിവും വിവരിച്ച്, പാര്‍ട്ടി ഓഫീസിന്റെ ഭൂമി മാന്താനെത്തിയാല്‍ കൈ വെട്ടുമെന്ന് പറഞ്ഞത് കാനത്തിന്റെ പാര്‍ട്ടിക്കാര്‍ തന്നെയായിരുന്നു.


അന്ന് വി എസ് അച്യുതാനന്ദന്‍ മുഖ്യമന്ത്രിയും കെ പി രാജേന്ദ്രന്‍ റവന്യൂ മന്ത്രിയുമായിരുന്നു. ആ പട്ടയ ഭൂമിയുടെയും വിരിവിന്റെയും കാര്യത്തില്‍ എന്ത് തീര്‍പ്പാണുണ്ടായതെന്ന് പിന്നീട് ആരുമറിഞ്ഞില്ല. അന്നത്തെ കൈയേറ്റമൊഴിപ്പിക്കല്‍ മൂന്നാറിലെ സി പി ഐ ഓഫീസിന്റെ മുന്നില്‍ അവസാനിച്ചെന്ന് കൈയേറ്റ വിരുദ്ധ ചരിത്രത്തിന്റെ പല വാള്യങ്ങളിലൊന്നില്‍ രേഖപ്പെടുത്തിയിട്ടുണ്ട്. ലിപി തങ്കമോ രജതമോ എന്നതിലേ തര്‍ക്കമുള്ളൂ. കോട്ടിട്ടയാളും അതിന്റെ മേലുള്ളയാളും മറുപടി പറയാതെ അഴിഞ്ഞ മുടി കെട്ടില്ലെന്ന് അന്ന് പന്ന്യന്‍ രവീന്ദ്രന്‍ പറഞ്ഞപ്പോള്‍ എം എം മണി മുതല്‍ എസ് രാജേന്ദ്രന്‍ വരെയുള്ള സി പി എം നേതാക്കള്‍ വി എസ്സിനെ തള്ളിപ്പറഞ്ഞ് കൂടെനിന്നിരുന്നു. അന്നും കൈയേറ്റമൊഴിപ്പിക്കണമെന്നതായിരുന്നു ഇടതു നയം. അതു തന്നെയാണ് ഇപ്പോഴും നയമെന്ന് കോടിയേരി ബാലകൃഷ്ണനും പറയുന്നു. പിന്നെ തര്‍ക്കമെന്ത്?


ഒരിക്കലും പൂര്‍ത്തിയാകാത്ത പട്ടയ വിതരണവും കല്‍പ്പാന്തകാലത്തോളം മൂന്നാറില്‍ തുടരേണ്ട ടാറ്റയുടെ ഭരണവുമുള്ളപ്പോള്‍ കൈയേറ്റമൊഴിപ്പിക്കലിനെക്കുറിച്ച് തര്‍ക്കം മാത്രമേ വേണ്ടൂ. കൃത്യമായ ഇടവേളകളില്‍ അതങ്ങനെ ആവര്‍ത്തിക്കും. സര്‍ക്കാര്‍ ഭൂമി, സര്‍ക്കാറിന്റേതാകണമെന്ന മൂഢചിന്തയുമായി ചില ഉദ്യോഗസ്ഥര്‍ ചിലകാലമെത്തുമ്പോള്‍ അതിന് അവസരമുണ്ടാകും. സര്‍ക്കാറിന്റെ ഭൂമിയെന്നാല്‍ ജനങ്ങളുടെ ഭൂമിയാണെന്നും ജനങ്ങളെന്നാല്‍ സമ്പത്തും അധികാരത്തെ സ്വാധീനിക്കാന്‍ കഴിവും ഉള്ളവര്‍ മാത്രമാണെന്നും തിരിയാത്ത ഉദ്യോഗസ്ഥര്‍, ഉദ്യോഗസ്ഥ ദുഷ്പ്രഭുക്കള്‍.


വിവരം അവകാശമാണെന്നതില്‍ പണ്ടേ തര്‍ക്കമില്ല കമ്മ്യൂണിസ്റ്റ് പാര്‍ട്ടികള്‍ക്ക്. അതിനൊരു കമ്മ്യൂണിസ്റ്റ് ടിപ്പണി വേണമെന്ന നിര്‍ബന്ധമേയുള്ളൂ. ഇടതുപക്ഷ സര്‍ക്കാറിന്റെ കാര്യത്തിലായാലും അതങ്ങനെ തന്നെ വേണം. ടിപ്പണി സാധ്യമല്ലാത്തതില്‍ അവകാശം സ്ഥാപിക്കാന്‍ ശ്രമിച്ചാല്‍ അനുവദിക്കാനുമാകില്ല. മന്ത്രിസഭാ തീരുമാനങ്ങളുടെ കാര്യത്തിലൊരു ന്യായാന്യായ പരിശോധനയാകാമെന്ന് പിണറായി വിജയന്‍ തീരുമാനിച്ചതും സി പി എം അനുവാദം നല്‍കിയതും അതുകൊണ്ടാണ്. ഇടതില്‍ ഇടതാകാന്‍ ശ്രമിക്കുന്ന കാനത്തിനും കൂട്ടര്‍ക്കും ഇത് മനസ്സിലാകുന്നില്ലെങ്കില്‍, ചരിത്രജ്ഞാനത്തിലുള്ള കുറവെന്നേ പറയാനാകൂ. ആ വസ്തുത മനസ്സിലാക്കാത്തിടത്തോളം വിമര്‍ശത്തില്‍ കഴമ്പില്ല തന്നെ. ചരിത്രജ്ഞാനം പോഷിപ്പിക്കല്‍ മുന്നണി യോഗത്തിലാകാം, മന്ത്രിസഭാ യോഗത്തിലുമാകാം. രണ്ടിടത്തും ഘടകന്‍മാര്‍ക്ക് മൗനം വിധിച്ചിട്ടുള്ളതിനാല്‍ ജ്ഞാന സമ്പാദനം മുഷിയില്ല.

പറയേണ്ട കാര്യങ്ങള്‍ പറയേണ്ട സ്ഥലത്ത് പറയാന്‍ ഭയമുള്ളതിനാല്‍ വിധിക്കാതെ തന്നെ മൗനം ദീക്ഷിക്കാം. അതങ്ങനെ തുടര്‍ന്ന് വീര്‍പ്പുമുട്ടുമ്പോള്‍ വിമര്‍ശം പരസ്യത്തിലാകാം. അണി - പണ ശേഷിയില്‍ ഏറെ മുന്നിലുള്ള മാര്‍ക്‌സിസ്റ്റുകള്‍ക്ക് കീഴ്‌വഴങ്ങുന്നില്ല നേതൃത്വമെന്ന് ശേഷിക്കുന്ന അനുയായികളെ ബോധ്യപ്പെടുത്താന്‍ അതേ മാര്‍ഗമുള്ളൂ. സ്വന്തം പ്രസക്തി സ്വയം ബോധ്യപ്പെടുത്താനുള്ള മരുന്നുമാകും.


പതിനൊന്ന് മാസത്തിനിടെ, മുഖ്യമന്ത്രി പലകുറി ഏറ്റുപറഞ്ഞതാണ് പൊലീസിന്റെ വീഴ്ചകള്‍. എന്താരോപണമുണ്ടായാലും തെളിവ് കൊണ്ടുവരൂ എന്ന് മുന്‍ മുഖ്യമന്ത്രി ഉമ്മന്‍ ചാണ്ടി ആവര്‍ത്തിച്ചത് മാത്രമേ ഇതിനോട് മത്സരിക്കാനുള്ളൂ. എന്നിട്ടും പൊലീസ് ഭരണത്തില്‍ ഇടതിന്റെ നിറമില്ലെന്ന് പറഞ്ഞാല്‍, മകന്റെ മരണത്തിന് ഉത്തരവാദികളുണ്ടെങ്കില്‍ കണ്ടെത്തണമെന്നാവശ്യപ്പെട്ട് ഡി ജി പി ഓഫീസിന് മുന്നില്‍ സമരത്തിനെത്തിയവരെ ക്രമസമാധാനം ഉറപ്പാക്കേണ്ട ചുമതലയുള്ള പോലീസ് നീക്കംചെയ്തത് ഇടതുനയമല്ലെന്ന് പറഞ്ഞാല്‍ വസ്തുതകളെ തൊണ്ടതൊടാതെ വിഴുങ്ങാനറിയില്ലെന്നാണ് അര്‍ഥം. സമരം ചെയ്യാതെ തന്നെ നേടാവുന്ന ആവശ്യങ്ങള്‍ സമരത്തിലൂടെ നേടിയെന്ന് അവകാശപ്പെട്ടാല്‍ നേടിയത് എന്തെന്ന് ചോദിക്കും. അത് മുതലാളിമാരുടെ ചോദ്യമെന്ന് പരിഹസിച്ചാല്‍ അതിലൊരു ഇടത് സ്പര്‍ശമില്ല, ഇല്ലേയില്ല.


ജിഷ്ണു പ്രണോയിയുടെ മരണത്തിന് ഉത്തരവാദിയാരെന്ന് അറിയുക തന്നെ വേണം. അതിനൊപ്പം പ്രധാനമല്ലേ വാളയാറില്‍ രണ്ട് പെണ്‍കുഞ്ഞുങ്ങള്‍ ദുരൂഹ സാഹചര്യത്തില്‍ മരിച്ച സംഭവം. അവിടെയുമുണ്ടായിരുന്നു പോലീസിന്റെ വീഴ്ച. അന്വേഷണം കാര്യക്ഷമമായി നടക്കുന്നുണ്ടോ എന്നതിലൊരു കമ്പം തോന്നിയതേയില്ല ആര്‍ക്കും. അടിസ്ഥാന വര്‍ഗത്തിന്റെ കാര്യത്തില്‍ സവിശേഷ ശ്രദ്ധ പുലര്‍ത്തുന്ന, ഇടതുപക്ഷമായ സി പി ഐക്ക് പോലുമില്ല. സമരവീര്യമില്ലാത്ത പട്ടികജാതിക്കാരിയായ അമ്മക്ക് നീതി നേടിക്കൊടുക്കാനുള്ള യത്‌നം കൊണ്ട് ആര്‍ക്കെന്ത് നേട്ടം? ക്ഷീരമുള്ളിടത്തല്ലേ ചോരക്ക് കൗതുകം വേണ്ടൂ!


യു എ പി എ ചുമത്തരുതെന്നാണ് ഇടത് നയം. അതിന് അപവാദമുണ്ടാക്കി, പ്രസ്തുത നിയമം ചുമത്തപ്പെട്ടാല്‍ പരിശോധിച്ച് തിരുത്തും. തെറ്റ് ചെയ്യുക, ചെയ്തത് തെറ്റെന്ന് ബോധ്യപ്പെട്ടാല്‍ തിരുത്തുക - അതാണ് യഥാര്‍ഥ ഇടതുപക്ഷം, വിശേഷിച്ച് സി പി എം. അതിന് ശ്രമിക്കുമ്പോള്‍, വിമര്‍ശിക്കുന്നത് പ്രതിപക്ഷ ക്രിയയാണ്, ശത്രുക്കളുടെ കൈയില്‍ ആയുധം വെച്ചുകൊടുത്ത് ആക്രമിക്കാന്‍ പ്രേരിപ്പിക്കലാണ്. ഇതര സംസ്ഥാനങ്ങളിലെ മാവോയിസ്റ്റുകള്‍ ഇടതുപക്ഷ അധീനതയിലുള്ള വനാതിര്‍ത്തിയിലെത്തി അട്ടിമറിക്ക് ശ്രമിച്ചാല്‍ ഏറ്റുമുട്ടി ഇല്ലാതാക്കുക എന്നതും ഇടതു നയം. അതിനെ മാവോയിസ്റ്റുകളെ പിടികൂടി വെടിവെച്ചുകൊന്ന് ഏറ്റുമുട്ടലായി ചിത്രീകരിച്ചെന്ന് പ്രചരിപ്പിക്കുന്നത് ഇടത് വിരുദ്ധവും. കേരള പോലീസിന്റെ ഏറ്റുമുട്ടല്‍ തന്ത്രങ്ങളില്‍ അത്രയെളുപ്പം വ്യാജം കലരില്ലെന്ന ബോധ്യമില്ലാതെ വന്നാല്‍, വസ്തുതകളറിയാതെ വിമര്‍ശിക്കും. അതൊക്കെ തിരുത്തി മുന്നണിയെ പൂര്‍വാധികം ശക്തിപ്പെടുത്തി, സര്‍ക്കാറിന്റെ തിളക്കം വര്‍ധിപ്പിക്കുകയാണ് വേണ്ടത്. അതിനാണ് ഒത്തുതീര്‍പ്പ് വൃത്തം. കലഹസമൃദ്ധമായിരുന്ന പാര്‍ട്ടിക്കാലത്തില്‍ പലകുറി ചമച്ച വൃത്തം. വേലിക്കകത്തു നിന്ന് പുറത്തേക്കിറങ്ങാത്ത, ച്യുതിയില്ലാത്ത കടുംപിടുത്തത്തെ പാര്‍ട്ടിക്കൊപ്പം നിര്‍ത്തിയ ചാതുരി. അതിലും വലിയ തോട്ടി ചാരേണ്ടിവരില്ല കാനത്തിനും സി പി ഐക്കും.


പ്രശ്‌നവശാല്‍ ചര്‍ച്ചയാകാമെന്നാണ് കവി മനസ്സ്. മുന്നണിയായും ഒറ്റക്കൊറ്റക്കും. ഒരുപാധിയേയുള്ളൂ, വസ്തുതകള്‍ മനസ്സിലാക്കണം.  ഭരണത്തിലെ വസ്തുത നന്നായി അറിയാവുന്നത് അതിന് നേതൃത്വം നല്‍കുന്ന മുഖ്യമന്ത്രിക്കാണ്. പിണറായി പറയും. കോടിയേരി ആവര്‍ത്തിക്കും. കാനത്തിനും കൂട്ടര്‍ക്കും മനസ്സിലാകും. ഇടതുനിലപാട് ഊട്ടിയുറപ്പിച്ചതിന്റെയും മുന്നണി പൂര്‍വാധികം ശക്തിപ്പെട്ടതിന്റെയും പ്രഖ്യാപനം വൈക്കം വിശ്വന്‍ നടത്തും. അവിടെ അവസാനിക്കും മുന്നണി വിപ്ലവം. അപ്പുറത്തേക്ക് വഴികളില്ലെന്ന് കാനത്തിനും കൂട്ടര്‍ക്കും അറിയാവുന്നത് പോലെ മറ്റാര്‍ക്കും അറിയില്ലല്ലോ!

2017-03-27

മണി ബില്ലില്‍ സുഖശയനം, ആധാര്‍ ബന്ധിത വിരേചനം


രാജ്യം അടിയന്തരാവസ്ഥയിലാണോ? നിലവിലുള്ള ജനാധിപത്യ സമ്പ്രദായങ്ങളൊക്കെ അട്ടിമറിക്കപ്പെടുമ്പോള്‍, ഭരണഘടനാ സ്ഥാപനങ്ങളെയൊക്കെ വരുതിയിലാക്കാന്‍ ഭരണകൂടം ശ്രമിക്കുമ്പോള്‍, പൗരന്റെ അവകാശങ്ങളെ ഓരോന്നായി ഇല്ലാതാക്കിക്കൊണ്ടിരിക്കുമ്പോള്‍ അത് അടിയന്തരവാസ്ഥ തന്നെയാണ്. അടിയന്തരാവസ്ഥയെന്നാല്‍ ഏകാധിപത്യവുമാണ്, അത് വ്യക്തിയുടേതായാലും ആ വ്യക്തിയുടെ വിധേയത്വത്തിലുള്ള പാര്‍ട്ടിയുടേതായാലും.


ആദായനികുതി നിയമത്തില്‍ മാറ്റം വരുത്തിയിരിക്കുന്നു ധനമന്ത്രി അരുണ്‍ ജെയ്റ്റ്‌ലി. കണക്കില്‍പ്പെടാത്ത സമ്പത്ത് കൈവശം വെച്ചിരിക്കുന്നുവെന്നും അത് വെളിപ്പെടുത്താന്‍ ഇടയില്ലെന്നും വിശ്വസിക്കാനോ സംശയിക്കാനോ കാരണമുണ്ടെങ്കില്‍ പരിശോധന നടത്താന്‍ (റെയ്ഡ്)  ആദായ നികുതി വകുപ്പ് ഉദ്യോഗസ്ഥര്‍ക്ക് അനുവാദം നല്‍കുകയാണ് ഈ മാറ്റത്തിലൂടെ. റെയ്ഡ് നടത്താന്‍ ഉദ്ദേശിക്കുന്നുവെന്ന വിവരം ആരെയും അറിയിക്കേണ്ടതില്ല, ട്രൈബ്യൂണലുള്‍പ്പെടെ ഒരു സംവിധാനത്തിന്റെയും അനുവാദം വാങ്ങേണ്ടതില്ല. വാറണ്ടിന്റെ ആവശ്യവുമില്ല. റെയ്ഡ് നടത്തിയത് നീതിയല്ലെന്ന പരാതിയുമായി കോടതിയെ സമീപിക്കാന്‍ ആര്‍ക്കും അധികാരമുണ്ടാവില്ലെന്നതാണ് നിയമത്തില്‍ വരുത്തിയ മാറ്റത്തിന്റെ കാതല്‍. കണക്കില്‍പ്പെടാത്ത സമ്പാദ്യമുണ്ടെന്ന സംശയം റെയ്ഡ് ചെയ്യുന്ന ഉദ്യോഗസ്ഥര്‍ക്കുണ്ടായാല്‍ മേലുദ്യോഗസ്ഥന്റെ അനുവാദത്തോടെ, ആറു മാസത്തേക്ക് സ്വത്ത് പിടിച്ചെടുക്കാനും നിയമത്തില്‍ വരുത്തിയ മാറ്റം അനുവാദം നല്‍കുന്നു. അത് കോടതിയില്‍ ചോദ്യംചെയ്യാന്‍ അധികാരമുണ്ടോ എന്നതില്‍ തിട്ടം പോര.


പുതിയ സാമ്പത്തിക വര്‍ഷം ആരംഭിക്കുന്ന ഏപ്രില്‍ ഒന്നിന് ധനകാര്യ ബില്ലിലെ വ്യവസ്ഥകള്‍ പ്രാബല്യത്തിലാകുന്നതോടെ ആദായ നികുതി വകുപ്പ് ഉദ്യോഗസ്ഥര്‍ക്ക് എവിടെയും പരിശോധന നടത്താവുന്ന സാഹചര്യമുണ്ടാകും. കണക്കില്‍പ്പെടാത്ത സ്വത്തുണ്ടെന്ന ശങ്കയുണ്ടായാല്‍ മാത്രം മതിയാകും. ആ ശങ്കയുടെ ഇരകള്‍ ആരൊക്കെയാകും? നരേന്ദ്ര മോദി സര്‍ക്കാര്‍ അധികാരത്തിലേറിയ ശേഷം ആരെയൊക്കെ ലക്ഷ്യമിട്ടുവെന്നത് നോക്കിയാല്‍ ഉത്തരം കിട്ടും. ആദ്യം ലക്ഷ്യമിട്ടത് സര്‍ക്കാറിതര സംഘടനകളെയായിരുന്നു. വിദേശനാണയ വിനിമയച്ചട്ടം ലംഘിച്ചവരെന്ന് ആരോപിച്ച്. വിദേശത്തു നിന്ന് ധനസഹായം സ്വീകരിക്കുന്നതിനുള്ള ലൈസന്‍സുകള്‍ റദ്ദ് ചെയ്തുകൊണ്ടായിരുന്നു തുടക്കം. ഇരുപതിനായിരത്തിലധികം സന്നദ്ധ സംഘടനകളുടെ ലൈസന്‍സാണ് റദ്ദാക്കിയത്. ദേശീയ താത്പര്യങ്ങള്‍ക്ക് വിരുദ്ധമായി, വികസന താത്പര്യങ്ങള്‍ക്ക് വിരുദ്ധമായി പ്രവര്‍ത്തിക്കുന്നുവെന്നതായിരുന്നു പ്രധാന ആരോപണം. ഇത് തെളിയിക്കാന്‍ ഇന്റലിജന്‍സ് ബ്യൂറോകളുടെ റിപ്പോര്‍ട്ടുകള്‍ ഉയര്‍ത്തിക്കാട്ടുകയും ചെയ്തു.


ആണവ ഇന്ധനവും കല്‍ക്കരിയും ഉപയോഗിച്ച് വൈദ്യുതോത്പാദന പദ്ധതികള്‍ ആരംഭിക്കുന്നതിന് എതിരെ സമരം ചെയ്യുന്ന സംഘടനകള്‍, ജനിതകമാറ്റം വരുത്തിയ വിത്തുകള്‍ പ്രോത്സാഹിപ്പിക്കാനുള്ള ശ്രമത്തിന് എതിരെ സമരം ചെയ്യുന്ന സംഘടനകള്‍, പോസ്‌കോയെയും വേദാന്തയെയും പോലുള്ളവ മുന്നോട്ടുവെക്കുന്ന വന്‍കിട പദ്ധതികള്‍ക്കെതിരെ സമരം ചെയ്യുന്ന സംഘടനകള്‍, അനിയന്ത്രിതമായ ഖനനത്തിന് എതിരെ സമരം ചെയ്യുന്ന സംഘടനകള്‍ ഒക്കെയാണ് നരേന്ദ്ര മോദി സര്‍ക്കാറിന്റെ ഇരകളായതില്‍ പ്രധാനം. അതിനൊപ്പം ഗുജറാത്ത് വംശഹത്യാ ശ്രമത്തിന്റെ വസ്തുതകള്‍ പുറത്തുകൊണ്ടുവരാന്‍ ശ്രമിച്ച സംഘടനകളും വ്യക്തികളും ലക്ഷ്യങ്ങളായി. അത്തരം സംഘടനകള്‍ക്കും വ്യക്തികള്‍ക്കുമെതിരെ കേസെടുക്കാന്‍ പോലും സര്‍ക്കാര്‍ തയ്യാറായി. തീവ്ര ഹിന്ദുത്വ അജന്‍ഡകള്‍ക്കെതിരെ പ്രവര്‍ത്തിക്കുന്ന സംഘടനകളെയും വ്യക്തികളെയും നിശ്ശബ്ദരാക്കാനോ ഇല്ലാതാക്കാനോ ശ്രമം നടക്കുകയും ചെയ്യുന്നു.


ഈ സാഹചര്യത്തില്‍ ആദായ നികുതി വകുപ്പ് ഉദ്യോഗസ്ഥര്‍ക്ക് നിയമപ്രകാരം ലഭിക്കുന്ന അനിയന്ത്രിതമായ അധികാരത്തിന്റെ ഇരകള്‍ ആരായിരിക്കുമെന്നത് ഗൗരവത്തോടെ ആലോചിക്കേണ്ടതുണ്ട്. നരേന്ദ്ര മോദിയെ, അദ്ദേഹത്തിന്റെ നേതൃത്വത്തിലുള്ള സര്‍ക്കാറിനെ, സംഘപരിവാരത്തെയൊക്കെ വിമര്‍ശിക്കുന്ന സംഘടനകളും വ്യക്തികളുമൊക്കെ ലക്ഷ്യങ്ങളാകുമെന്നതില്‍ തര്‍ക്കം വേണ്ട. ജനത്തെയാകെ ഭീതിയിലാക്കി, അധികാരമുറപ്പിക്കുക എന്നത് ഏകാധിപതികളൊക്കെ പിന്തുടര്‍ന്ന രീതിയാണ്. 'നാവടക്കൂ പണിയെടുക്കൂ' എന്ന മുദ്രാവാക്യമുയര്‍ന്ന അടിയന്തരാവസ്ഥയില്‍ ഇന്ദിരാ ഗാന്ധിയും സഞ്ജയ് ഗാന്ധിയുടെ നേതൃത്വത്തില്‍ ഭരണത്തെ നിയന്ത്രിച്ച ഗൂഢസംഘവും ശ്രമിച്ചത് ജനതയെ ഭീതിയിലാഴ്ത്തി അധികാരമുറപ്പിച്ചുനിര്‍ത്താനാണ്. വംശഹത്യാ ശ്രമത്തിന് ശേഷം ഗുജറാത്തിനെ വ്യാഴവട്ടിത്തിലേറെക്കാലം നരേന്ദ്ര മോദി ഭരിച്ചത് സ്വന്തം പാര്‍ട്ടിയെപ്പോലും ഭീതിയുടെ നിഴലില്‍ നിര്‍ത്തിക്കൊണ്ടായിരുന്നു. അത് ആവര്‍ത്തിക്കുകയാണ് ഇന്ത്യന്‍ യൂണിയനില്‍, പല വിധത്തില്‍.


ഫോണ്‍ കണക്ഷന്‍ മുതല്‍ സ്‌ക്കൂളിലെ ഉച്ചക്കഞ്ഞിവരെ സകലതിനും ആധാര്‍ നിര്‍ബന്ധമാക്കുന്ന തീരുമാനം ഇതിന്റെ തുടര്‍ച്ചയായി കാണണം. പാന്‍ കാര്‍ഡ് എടുക്കുന്നതിനും ആദായ നികുതി റിട്ടേണ്‍ സമര്‍പ്പിക്കുന്നതിനുമൊക്കെ ആധാര്‍ നിര്‍ബന്ധമാക്കിക്കൊണ്ടുള്ള നിയമ ഭേദഗതിയും ഇതിനൊപ്പം കൊണ്ടുവന്നിട്ടുണ്ട്. സര്‍ക്കാര്‍ ആനുകൂല്യങ്ങള്‍ക്ക് ആധാര്‍ നിര്‍ബന്ധമാക്കരുതെന്ന സുപ്രീം കോടതി വിധി നിലനില്‍ക്കെയാണ് വിരേചനമൊഴികെ ഏതാണ്ടെല്ലാറ്റിനും ആധാര്‍ നിര്‍ബന്ധമാക്കാന്‍ നരേന്ദ്ര മോദി സര്‍ക്കാര്‍ തീരുമാനിക്കുന്നത്. ആധാര്‍ കൊണ്ടുവരാന്‍ യു പി എ സര്‍ക്കാര്‍ തീരുമാനിച്ചപ്പോള്‍ അതിനെ എതിര്‍ത്തവരുടെ മുന്‍പന്തിയില്‍ തങ്ങളുമുണ്ടായിരുന്നുവെന്ന ഓര്‍മ പോലും മോദി, ജെയ്റ്റ്‌ലി പ്രഭൃതികള്‍ക്കില്ല, സംഘപരിവാരത്തിനുമില്ല. പൗരന്‍മാരുടെ എല്ലാ പ്രവൃത്തികളെയും ഭരണകൂടം നിരീക്ഷിക്കുന്നുണ്ടെന്ന് ബോധ്യപ്പെടുത്തുകയാണ് ഇതിന്റെ ഉദ്ദേശ്യം. ഭരണകൂടത്തിന് വഴങ്ങാത്തവരുടെ ജീവിതത്തില്‍ ഇടപെടാന്‍ തങ്ങള്‍ക്ക് നിഷ്പ്രയാസം സാധിക്കുമെന്ന ഭീഷണി, എതിര്‍ ശബ്ദങ്ങള്‍ ഇല്ലാതാക്കുക എന്നതിനപ്പുറത്ത് 130 കോടി വിധേയരെ സൃഷ്ടിച്ചെടുക്കാനാണ്.


വിവിധ ട്രൈബ്യൂണലുകളുടെ അധ്യക്ഷന്‍മാരെ നിയമിക്കാനുള്ള അവകാശം കേന്ദ്ര സര്‍ക്കാറില്‍ നിക്ഷിപ്തമാക്കിക്കൊണ്ടുള്ള നിയമ ഭേദഗതിയും ഇതിനൊപ്പമുണ്ടായി. സര്‍ക്കാറിന്റെയും നീതിന്യായ സംവിധാനത്തിന്റെയുമൊക്കെ പ്രതിനിധികള്‍ ഉള്‍ക്കൊള്ളുന്ന സമിതിയാണ് ട്രൈബ്യൂണല്‍ അധ്യക്ഷന്‍മാരെ നിശ്ചയിച്ചിരുന്നത്. ഇതില്‍ മാറ്റം വരുത്തിയത് സര്‍ക്കാറിന്റെ (നരേന്ദ്ര മോദിയുടെ) സംഘപരിവാരത്തിന്റെ ഇംഗിതത്തിന് അനുസരിച്ച് മാത്രം കാര്യങ്ങള്‍ നീങ്ങണമെന്ന ഉദ്ദേശ്യത്തിലാണ്. ആംഡ് ഫോഴ്‌സസ് ട്രൈബ്യൂണല്‍, ഗ്രീന്‍ ട്രൈബ്യൂണല്‍ തുടങ്ങി സുപ്രധാനമായ പലതിന്റെയും തലവന്‍മാരെ നിയമിക്കാനുള്ള അധികാരം സര്‍ക്കാറില്‍ നിക്ഷിപ്തമാകുകയാണ്. സര്‍ക്കാറിന്റെ ഇംഗിതമറിഞ്ഞുള്ള തീരുമാനങ്ങള്‍ മാത്രമേ ട്രൈബ്യൂണലില്‍ നിന്ന് വരേണ്ടതുള്ളൂവെന്ന് ഉറപ്പാക്കുകയാണ് ഇതിലൂടെ. വിവിധ ട്രൈബ്യൂണലുകളെ ഏകോപിപ്പിക്കാനും തീരുമാനമെടുത്തിട്ടുണ്ട്. അതായത് പരാതികളുടെ ബാഹുല്യം മൂലം ട്രൈബ്യൂണലുകളുടെ പ്രവര്‍ത്തനം മന്ദഗതിയിലാകണമെന്ന നിര്‍ബന്ധബുദ്ധി സര്‍ക്കാറിനുണ്ടെന്ന് ചുരുക്കം. പരാതി നല്‍കിയാല്‍ വിധിയുണ്ടാകാന്‍ വര്‍ഷങ്ങളെടുക്കുമെന്ന സ്ഥിതിയുണ്ടായാല്‍ അതിനെ സമീപിക്കുന്നവരുടെ എണ്ണം കുറയും. സര്‍ക്കാറിന്റെ നിക്ഷിപ്ത താത്പര്യങ്ങള്‍ സംരക്ഷിക്കാന്‍ പാകത്തിലുള്ള അന്തരീക്ഷം സൃഷ്ടിക്കാന്‍ ഇതിലൂടെ സാധിക്കുമെന്ന് നരേന്ദ്ര മോദിയും സംഘവും കണക്കുകൂട്ടുന്നുണ്ടാകണം.


ഇതുള്‍പ്പെടെ അമ്പതോളം നിയമങ്ങളിലെ ഭേദഗതികളാണ് ധനകാര്യ ബില്ലിനൊപ്പം ധനമന്ത്രി അരുണ്‍ ജെയ്റ്റ്‌ലി ചുട്ടെടുത്തത്. മണി ബില്ലായതിനാല്‍ ലോക്‌സഭയുടെ അംഗീകാരം മാത്രം മതിയാകും ഇവയൊക്കെ പ്രാബല്യത്തിലാകുന്നതിന്. ബി ജെ പിക്ക് ഭൂരിപക്ഷമില്ലാത്ത രാജ്യസഭയുടെ അംഗീകാരം വേണ്ടതില്ല. ധനകാര്യ ബില്ലെന്നത്, ബജറ്റ് പാസ്സാക്കുന്നതിന് വേണ്ടി കൂടിയുള്ളതാണ്. സാമ്പത്തിക വര്‍ഷം ആരംഭിക്കുന്ന ഏപ്രില്‍ ഒന്നിന് മുമ്പ് ധനകാര്യ ബില്ല് അംഗീകരിക്കപ്പെടണം. അതുകൊണ്ട് തന്നെ ധനകാര്യ ബില്ല് മടക്കിക്കൊണ്ട്, അതിനൊപ്പം വരുത്തിയ ഭേദഗതികളിലെ ജനാധിപത്യ വിരുദ്ധത ചൂണ്ടിക്കാട്ടാനുള്ള അവസരം രാഷ്ട്രപതിക്ക് പോലും ഉണ്ടാകില്ല.
അടിയന്തരാവസ്ഥ നടപ്പാക്കുന്ന (പ്രഖ്യാപിച്ചിട്ടായാലും അല്ലെങ്കിലും) ഏകാധിപത്യത്തിന് രാജ്യത്ത് നിലനില്‍ക്കുന്ന ജനാധിപത്യ സമ്പ്രദായങ്ങളെ പരിഗണിക്കേണ്ട ആവശ്യമേയില്ല. അടിയന്തരാവസ്ഥ പ്രഖ്യാപിച്ച്, പൗരാവകാശങ്ങളൊക്കെ റദ്ദുചെയ്തപ്പോള്‍ ജനാധിപത്യ സമ്പ്രദായത്തിന് തൃണപരിഗണന പോലും നല്‍കിയിരുന്നില്ല ഇന്ദിരാഗാന്ധി. ജനാധിപത്യ, മതനിരപേക്ഷ, സോഷ്യലിസ്റ്റ് റിപ്പബ്ലിക്കെന്ന ഭരണഘടനാ വാഗ്ദാനത്തെ, തെല്ലും പരിഗണിക്കാന്‍ മുമ്പ് തന്നെ തയ്യാറല്ലാത്ത സംഘപരിവാരത്തിനും സംഘപരിവാരത്തെപ്പോലും പരിഗണിക്കാതെ ഏകാധിപത്യ സ്വഭാവം കാണിക്കാന്‍ മടിയില്ലാത്ത പരമാധികാരിക്കും അടിയന്തരാവസ്ഥ പ്രാബല്യത്തിലാക്കുന്നതിന് അത് ജനത്തെ അറിയിക്കുക പോലും ആവശ്യമില്ല.


ആദ്യമായി പാര്‍ലിമെന്റിലേക്ക് പ്രവേശിക്കുമ്പോള്‍ താണുകുനിഞ്ഞു നമസ്‌കരിച്ചത്, ജനാധിപത്യത്തെ ഇല്ലാതാക്കുന്നതിനുള്ള അനുവാദം വാങ്ങലായിരുന്നുവെന്ന് മൂന്നാം വര്‍ഷത്തിലേക്ക് കടക്കുമ്പോള്‍ ബോധ്യമാകുകയാണ്. 2014ലെ ലോക്‌സഭാ തെരഞ്ഞെടുപ്പോടെ ദുര്‍ബലമാകുകയും ഭിന്നിച്ചുനിന്ന് കൂടുതല്‍ ദുര്‍ബലരാകാന്‍ സന്നദ്ധരാണെന്ന് തെളിയിക്കുകയും ചെയ്ത സംഘവിരുദ്ധ രാഷ്ട്രീയ പ്രസ്ഥാനങ്ങള്‍ക്ക് മുരടനക്കാന്‍ പോലുമാകുന്നില്ല. മണിബില്ലെന്ന പേരില്‍ ഇത്രയും നിയമങ്ങള്‍ ഒരുമിച്ച് ഭേദഗതി ചെയ്യുമ്പോള്‍ 'ജനാധിപത്യ ശ്രീകോവിലി'ന്റെ രണ്ട് വേദികളില്‍ നിശ്ശബ്ദ സാന്നിധ്യമായി അവരിരുന്നു.


സംഘപരിവാരത്തെ സമൂലം എതിര്‍ക്കുന്നുവെന്ന് അവകാശപ്പെടുന്ന സി പി എമ്മിന്റെ ജനറല്‍ സെക്രട്ടറി സീതാറാം യെച്ചൂരി, പാര്‍ട്ടിയുടെ ശക്തികേന്ദ്രമായി തുടരുന്ന കേരളത്തിലെത്തി വാര്‍ത്താ സമ്മേളനം നടത്തി, കോര്‍പ്പറേറ്റുകളില്‍ നിന്ന് രാഷ്ട്രീയപാര്‍ട്ടികള്‍ക്ക് സംഭാവന സ്വീകരിക്കുന്നതിനുള്ള വ്യവസ്ഥ ഉദാരമാക്കിയും അതിന്റെ വിവരങ്ങള്‍ ജനത്തിന് നല്‍കുന്നത് വിലക്കിയും കമ്പനി നിയമവും ജനപ്രാതിനിധ്യ നിയമവും ഭേദഗതി ചെയ്തതിലെ അനീതി ചൂണ്ടിക്കാട്ടി. അതിനൊപ്പം ശത്രുസ്വത്ത് നിയമം ഭേദഗതി ചെയ്തത് പ്രതിപക്ഷം സഭയിലില്ലാത്ത തക്കം നോക്കിയാണെന്ന് അദ്ദേഹം പറയുകയും ചെയ്തു. പ്രതിപക്ഷം സഭയിലില്ലാത്ത സാഹചര്യം എങ്ങനെയുണ്ടായെന്ന് പറയാതെ, അത് മുതലാക്കി ഭരണപക്ഷം പ്രവര്‍ത്തിച്ചുവെന്ന് യെച്ചൂരി കുറ്റപ്പെടുത്തുമ്പോള്‍ ജനാധിപത്യ, മതനിരപേക്ഷ, സോഷ്യലിസ്റ്റ് റിപ്പബ്ലിക്കിനെ സംരക്ഷിക്കാന്‍ ശ്രമിക്കുന്നവരുടെ ജാഗ്രതയില്‍ കൂടി സംശയമുയരുകയാണ്.
ഇന്ത്യന്‍ യൂണിയന്‍ ഏകാധിപത്യ - അടിയന്തരാവസ്ഥയിലാണെന്നും ദേശീയതയുടെ/രാജ്യസ്‌നേഹത്തിന്റെ പേരില്‍ അത് സ്വീകരിക്കാന്‍ സന്നദ്ധരാകുന്നവര്‍ കൂടി വരികയാണെന്നും മണിബില്ലിലൂടെ കൊണ്ടുവന്ന ഭേദഗതികളൊക്കെ ദേശത്തിന്റെ സുരക്ഷക്കാണെന്ന പ്രചണ്ഡ പ്രചാരണം ആരംഭിക്കുമ്പോള്‍ വെറുംകൈയോടെ നില്‍ക്കേണ്ടി വരുമെന്നും കോണ്‍ഗ്രസിന്, കമ്മ്യൂണിസ്റ്റ് പാര്‍ട്ടികള്‍ക്ക്, ജനതാ ദളങ്ങള്‍ക്ക് ബോധ്യപ്പെടാന്‍ എത്രകാലം വേണ്ടിവരുമോ ആവോ!

2017-03-10

അസിമാനന്ദ കുറ്റവിമുക്തനാകുമ്പോള്‍ രക്ഷപ്പെടുന്നവര്‍


2007ലെ റമസാന്‍ ദിനങ്ങളിലൊന്നിലാണ് അജ്മീറിലെ മുഈനുദ്ദീന്‍ ചിശ്തിയുടെ ദര്‍ഗയില്‍ സ്‌ഫോടനമുണ്ടായത്. മൂന്ന് പേര്‍ മരിച്ചു, പതിനഞ്ചിലധികം പേര്‍ക്ക് പരുക്കേറ്റു. പത്ത് വര്‍ഷമെത്താറാകുമ്പോള്‍ ഈ കേസില്‍ മൂന്ന് പേര്‍ കുറ്റക്കാരാണെന്ന് കോടതി വിധിച്ചിരിക്കുന്നു. പല നിലക്ക് പ്രാധാന്യമുണ്ട് ഈ കേസിനും അതില്‍ എന്‍ ഐ എ പ്രത്യേക കോടതി പുറപ്പെടുവിച്ച വിധിക്കും. സി പി ഐ (മാവോയിസ്റ്റ്) എന്ന നിരോധിത സംഘടനയുമായി ബന്ധമുണ്ടെന്ന കേസില്‍ ഡല്‍ഹി യൂണിവേഴ്‌സിറ്റിയില്‍ പ്രൊഫസറായ ജി എന്‍ സായി ബാബ ഉള്‍പ്പെടെ അഞ്ച് പേര്‍ക്ക് മഹാരാഷ്ട്ര ഗാഡ്ചിരോളിയിലെ വിചാരണക്കോടതി ശിക്ഷ വിധിച്ച് രണ്ട് ദിവസത്തിന് ശേഷമാണ് അജ്മീര്‍ സ്‌ഫോനടക്കേസില്‍ കോടതിയുടെ തീരുമാനം വന്നിരിക്കുന്നത്.


അജ്മീറടക്കം 2006നും 2008നുമിടക്കുണ്ടായ പല സ്‌ഫോടനങ്ങളുടെയും ആസൂത്രണത്തില്‍ മുഖ്യ പങ്കുവഹിച്ചതായി ആരോപിക്കപ്പെടുകയും ഇക്കാര്യത്തില്‍ മജിസ്‌ട്രേറ്റ് മുമ്പാകെ കുറ്റസമ്മത മൊഴി നല്‍കുകയും ചെയ്ത സ്വാമി അസിമാനന്ദ് എന്ന പേരില്‍ അറിയപ്പെടുന്ന നവ കുമാര്‍ കര്‍മപുകാറിനെയും മറ്റ് ആറു പേരെയും കുറ്റവിമുക്തരാക്കുന്നതാണ് ജയ്പൂരിലെ പ്രത്യേക എന്‍ ഐ എ കോടതിയുടെ തീരുമാനം. പരേതനായ സുനില്‍ ജോഷി, ഭവേഷ് പട്ടേല്‍, ദേവേന്ദ്ര ഗുപ്ത എന്നിവര്‍ കുറ്റക്കാരാണെന്നും കോടതി കണ്ടെത്തി. അസിമാനന്ദ് അടക്കമുള്ളവര്‍ക്കെതിരായ ആരോപണങ്ങള്‍ സംശയലേശമെന്യെ തെളിയിക്കാന്‍ പ്രോസിക്യൂഷന് സാധിച്ചില്ലെന്ന് വിചാരണക്കോടതി ചൂണ്ടിക്കാട്ടുന്നു.
അസിമാനന്ദിന്റെ, കുറ്റസമ്മത മൊഴിയെ കോടതി ഏത് വിധത്തിലാണ് പരിഗണിച്ചത് എന്നതില്‍ വ്യക്തതയായിട്ടില്ല. ബാഹ്യ സമ്മര്‍ദങ്ങളൊന്നുമില്ലാതെ, സ്വമനസ്സാലെ മൊഴി നല്‍കുകയാണ് എന്ന് കാണിച്ച് മജിസ്‌ട്രേറ്റ് മുമ്പാകെ കുറ്റസമ്മത മൊഴി നല്‍കിയ അസിമാനന്ദ് പിന്നീട് ഇതില്‍ നിന്ന് പിന്‍മാറുകയും സമ്മര്‍ദങ്ങളുടെ അടിസ്ഥാനത്തിലാണ് കുറ്റസമ്മത മൊഴി നല്‍കിയത് എന്ന് പറയുകയും ചെയ്തിരുന്നു. എന്നാല്‍ എല്ലാ നടപടിക്രമങ്ങളും പാലിച്ച്, കുറ്റസമ്മതമൊഴി നല്‍കുന്നതിലൂടെ ഉണ്ടാകാനിടയുള്ള അപകടങ്ങളെക്കുറിച്ച് ആലോചിക്കാന്‍ രണ്ട് ദിവസത്തെ സമയം പോലും മജിസ്‌ട്രേറ്റ് നല്‍കിയിരുന്നു, രേഖപ്പെടുത്തിയ കുറ്റസമ്മത മൊഴിയെ അസാധുവാക്കാന്‍ പാകത്തിലുള്ളതായി പിന്നിടൂള്ള നിഷേധത്തെ കോടതി കണ്ടുകാണണം.


ഇതൊക്കെയാണെങ്കിലും രാഷ്ട്രീയ സ്വയം സേവക് സംഘിന്റെ (ആര്‍ എസ് എസ്) നേതാക്കളായ സുനില്‍ ജോഷി, ഭവേഷ് പട്ടേല്‍, ദേവേന്ദ്ര ഗുപ്ത എന്നിവരെ കുറ്റക്കാരായി കോടതി കണ്ടെത്തുമ്പോള്‍ 'ഹിന്ദുത്വ ഭീകരവാദ ശൃംഖല' രാജ്യത്ത് പ്രവര്‍ത്തിക്കുന്നുവെന്ന ആരോപണങ്ങള്‍ ശരിവെക്കും വിധത്തില്‍ നിയമത്തിന്റെ മുദ്ര പതിഞ്ഞിരിക്കുന്നു. 'മുസ്‌ലിംകളെല്ലാം ഭീകരവാദികളല്ല പക്ഷേ എല്ലാ ഭീകരവാദികളും മുസ്‌ലിംകളാണ്' എന്ന് മുന്‍കാലത്ത് വിശദീകരിച്ചയാളാണ് രാജ്യത്തിന്റെ പ്രധാനമന്ത്രി. ഭീകരവാദത്തിന്റെ വക്താക്കളാണ് മുസ്‌ലിംകള്‍ എന്ന് പ്രചാരണം നടത്തുന്നതിന് സംഘ്പരിവാരം മടിച്ചിട്ടുമില്ല. അത്തരമൊരു സാഹചര്യത്തില്‍, ആര്‍ എസ് എസ് നേതാക്കള്‍ കുറ്റക്കാരാണെന്ന കോടതി തീരുമാനത്തിന് വലിയ പ്രസക്തിയുണ്ട്. ആര്‍ എസ് എസ് നിര്‍വചിക്കുന്നത് പോലൊരു സാംസ്‌കാരിക സംഘടന മാത്രമല്ല അതെന്ന് കോടതി സാക്ഷ്യപ്പെടുത്തുകയാണ്, ചുരുങ്ങിയപക്ഷം സ്വയം സേവകരായി എത്തുന്നവര്‍ ഭീകരവാദികളായി മാറുന്നുണ്ട് എന്നെങ്കിലും. അങ്ങനെ ഭീകരവാദികളായി മാറാന്‍ പാകത്തിലുള്ള അധ്യയനം ആ സംഘടനയില്‍ നടക്കുന്നുണ്ട് എന്നും.


ഇന്ത്യന്‍ യൂണിയന്റെ ഭരണം നരേന്ദ്ര മോദിയുടെ നേതൃത്വത്തില്‍ ബി ജെ പിയുടെ കൈകളില്‍ എത്തിയതിന് ശേഷം ഹിന്ദുത്വ ഭീകരവാദ ശൃംഖലയിലെ കണ്ണികള്‍ ആരോപണവിധേയരായ കേസുകള്‍ അട്ടിമറിക്കുന്നതിന് ആസുത്രിത ശ്രമം നടക്കുന്നുവെന്ന ആക്ഷേപം ഉയര്‍ന്നിട്ടുണ്ട്. സാധ്വി പ്രഗ്യാ സിംഗും കേണല്‍ ശ്രീകാന്ത് പുരോഹിതുമൊക്കെ ആരോപണവിധേയരായ മലേഗാവ് സ്‌ഫോടനക്കേസില്‍ മൃദു സമീപനം സ്വീകരിക്കണമെന്ന് എന്‍ ഐ എ ഉദ്യോഗസ്ഥര്‍ തന്നോട് ആവശ്യപ്പെട്ടതായി പ്രോസിക്യൂട്ടറായ രോഹിണി സന്യാല്‍ പറഞ്ഞിരുന്നു. അജ്മീര്‍ സ്‌ഫോടനക്കേസിലും എന്‍ ഐ എ അലംഭാവം കാട്ടിയെന്ന ആരോപണം ശക്തമാണ്. അസിമാനന്ദയുള്‍പ്പെടെ ആരോപണവിധേയര്‍ക്ക് ശിക്ഷ വാങ്ങിക്കൊടുക്കാന്‍ പാകത്തില്‍ എന്‍ ഐ എ ഉദ്യോഗസ്ഥര്‍ പ്രവര്‍ത്തിച്ചില്ല എന്ന് പറയുന്നത് ഈ കേസില്‍ പ്രോസിക്യൂട്ടറായിരുന്ന അശ്വിനി ശര്‍മയാണ്.


പ്രോസിക്യൂഷന്‍ സാക്ഷികളായിരുന്നവരില്‍ ഭൂരിഭാഗം പേരും കോടതിയില്‍ മൊഴി മാറ്റി. സാക്ഷികളെ സംരക്ഷിക്കാനോ അവരെ പ്രതിഭാഗം സ്വാധീനിക്കുന്നത് തടയാനോ എന്‍ ഐ എ ഉദ്യോഗസ്ഥര്‍ ശ്രമിച്ചതേയില്ല. പ്രോസിക്യൂഷന്‍ സാക്ഷികളായി കോടതിയില്‍ ഹാജരായ പലര്‍ക്കും (വിവിധ സംസ്ഥാനങ്ങളില്‍ നിന്നുള്ളവര്‍ സാക്ഷികളായുണ്ടായിരുന്നു) ജയ്പൂരില്‍ താമസ സൗകര്യമൊരുക്കിയത് പ്രതിഭാഗം അഭിഭാഷകരായിരുന്നു. ഇവര്‍ താമസിച്ച ഹോട്ടലിനെക്കുറിച്ചുള്ള വിവരം നല്‍കിയെങ്കിലും അന്വേഷിച്ച് തെളിവുകള്‍ കണ്ടെത്താന്‍ എന്‍ ഐ എ ഉദ്യോഗസ്ഥര്‍ മെനക്കെട്ടില്ല. കോടതിക്ക് പുറത്ത് പ്രോസിക്യൂഷന്‍ സാക്ഷികള്‍ പ്രതിഭാഗം അഭിഭാഷകരുമായി സംസാരിക്കുന്നത് പലകുറി കണ്ടു. ഇക്കാര്യം എന്‍ ഐ എ ഉദ്യോഗസ്ഥരെ അറിയിച്ച പ്രോസിക്യൂട്ടര്‍, അശ്വിനി ശര്‍മ കോടതിയിലെ ക്ലോസ് സര്‍ക്യൂട്ട് ക്യാമറകളിലെ ദൃശ്യങ്ങള്‍ ശേഖരിക്കണമെന്നും സാക്ഷികളെ സ്വാധീനിക്കാന്‍ നടക്കുന്ന ശ്രമം കോടതിയുടെ ശ്രദ്ധയില്‍ കൊണ്ടുവരണമെന്നും ആവശ്യപ്പെട്ടു. എന്നാല്‍ എന്‍ ഐ എ ഉദ്യോഗസ്ഥര്‍ അതിന് തയ്യാറായതേയില്ല. സാക്ഷികളെ സംരക്ഷിക്കുകയും അവര്‍ക്ക് പേടികൂടാതെ മൊഴി നല്‍കാനുള്ള അന്തരീക്ഷം സൃഷ്ടിക്കുകയും ചെയ്യുക എന്നത് തങ്ങളുടെ ഉത്തരവാദിത്തമല്ലെന്നായിരുന്നു എന്‍ ഐ എ ഉദ്യോഗസ്ഥരുടെ പക്ഷം.  പ്രോസിക്യൂഷന്‍ സാക്ഷികളെ, കോടതി മുറിയിലേക്ക് എത്തിച്ചിരുന്നത് പലപ്പോഴും പ്രതിഭാഗം അഭിഭാഷകര്‍ തന്നെയായിരുന്നു. സാക്ഷികളെ സ്വാധീനിക്കാനുള്ള ശ്രമം പകല്‍ വെളിച്ചത്തില്‍ നടക്കുമ്പോഴും അന്വേഷണ ഏജന്‍സിക്ക് പ്രശ്‌നമായി തോന്നിയതേയില്ല!


ഝാര്‍ഖണ്ഡ് വികാസ് മോര്‍ച്ചയുടെ നേതാവായിരുന്ന രണ്‍ധീര്‍ സിംഗ് ഈ കേസിലെ സാക്ഷിപ്പട്ടികയിലുണ്ടായിരുന്നു. പൊലീസിന് നല്‍കിയ മൊഴി കോടതിയില്‍ മാറ്റിപ്പറഞ്ഞ രണ്‍ധീര്‍ സിംഗ് ഝാര്‍ഖണ്ഡിലെ ബി ജെ പി സഖ്യ സര്‍ക്കാറിന്റെ ഭാഗമാണ് ഇപ്പോള്‍. 2014ലെ തിരഞ്ഞെടുപ്പിന് മുമ്പ് ബി ജെ പിയിലേക്ക് മടങ്ങാന്‍ ശ്രമിച്ച രണ്‍ധീറിനെ അന്ന് തള്ളിപ്പറഞ്ഞ പാര്‍ട്ടി നേതൃത്വം, പിന്നീട് സ്വീകരിച്ച് മന്ത്രിയാക്കുകയായിരുന്നു. ഉദ്ദിഷ്ട കാര്യത്തിനുള്ള ഉപകാരസ്മരണയായിരുന്നോ മന്ത്രിപദമെന്ന് അന്വേഷിക്കേണ്ട ചുമതല നിലവിലെ നീതിന്യായ സംവിധാനത്തില്‍ ഇല്ലതന്നെ.


സ്വാമി അസിമാനന്ദിനെ രക്ഷിച്ചെടുക്കുക എന്നതായിരുന്നു എന്‍ ഐ എയുടെ പ്രധാന ദൗത്യം എന്ന് സംശയിക്കാന്‍ ന്യായമുണ്ട്. അഭിനവ് ഭാരത് പോലുള്ള സംഘടനകള്‍ മാത്രമല്ല സ്‌ഫോടനങ്ങള്‍ക്ക് പിന്നില്‍ പ്രവര്‍ത്തിച്ചത് എന്ന് കുറ്റസമ്മതമൊഴിയിലുണ്ട്. ആര്‍ എസ് എസ് ദേശീയ എക്‌സിക്യൂട്ടീവ് അംഗം ഇന്ദ്രേഷ് കുമാര്‍ തിരഞ്ഞെടുത്ത് നിയോഗിച്ച ചില പ്രചാരകര്‍ ഭീകരാക്രമണങ്ങളില്‍ പങ്കാളിയായിട്ടുണ്ടെന്നും ഇവരുടെ ചെലവുകളെല്ലാം ഇന്ദ്രേഷ് കുമാറാണ് നോക്കിയിരുന്നതെന്നും. അസിമാനന്ദിന്റെ കുറ്റസമ്മതമൊഴിയില്‍ ഇങ്ങനെ പറയുന്നു - ''2005ല്‍ ഇന്ദ്രേഷ്ജി ശബരി ധാമിലെത്തി (ഗുജറാത്തിലെ ഡാംഗില്‍ അസിമാനന്ദിനുള്ള ആശ്രമം) എന്നെ കണ്ടു. ആര്‍ എസ് എസ്സിന്റെ നിരവധി ഉയര്‍ന്ന ഭാരവാഹികള്‍ അദ്ദേഹത്തോടൊപ്പമുണ്ടായിരുന്നു. സുനില്‍ ജോഷിയെ ഈ ജോലിക്ക് ചുമതലപ്പെടുത്തിയിട്ടുണ്ടെന്ന് അദ്ദേഹം പറഞ്ഞു. ജോഷിക്ക് വേണ്ട സഹായമെല്ലാം ചെയ്തു കൊടുക്കുമെന്നും പറഞ്ഞു''


 അസിമാനന്ദ കുറ്റക്കാരനായി മാറിയാല്‍ കുറ്റസമ്മത മൊഴിയില്‍ പറയുന്ന, അഭിനവ് ഭാരതിന് പുറമെയുള്ള സംഘടനകള്‍ ഏതൊക്കെ എന്ന് അന്വേഷിക്കേണ്ടിവരും. ഇന്ദ്രേഷ് കുമാറിന് പുറമെ ശബരി ധാമിലെത്തിയ ഉയര്‍ന്ന ആര്‍ എസ് എസ് നേതാക്കള്‍ ആരൊക്കെ എന്ന അന്വേഷണം പേരിനെങ്കിലും നടത്തേണ്ടിവരും. (ഇപ്പോഴത്തെ സര്‍സംഘ് ചാലക് മോഹന്‍ ഭാഗവത് ആ സംഘത്തിലുണ്ടായിരുന്നുവെന്ന്  അസിമാനന്ദ പിന്നീട് മാധ്യമപ്രവര്‍ത്തകയോട് പറഞ്ഞിരുന്നു) ഗുഢാലോചനയില്‍ പങ്കാളിയായെന്ന് അസിമാനന്ദ തന്നെ പറയുന്ന ഇന്ദ്രേഷ് കുമാറിനെ എന്തുകൊണ്ട് ചോദ്യം ചെയ്തില്ല എന്ന ചോദ്യമുണ്ടാകും. സംഘ് പരിവാരത്തിന് അസ്വാസ്ഥ്യമുണ്ടാകുന്ന ഇത്തരമൊരു സാഹചര്യം ഒഴിവാക്കേണ്ട ഉത്തരവാദിത്തം നരേന്ദ്ര മോദിക്ക് കീഴിലാകുമ്പോള്‍ എന്‍ ഐ എക്കുണ്ടാകുക സ്വാഭാവികമാണ്. ആ ചുമതല നിര്‍വഹിക്കാന്‍ അവര്‍ പരമാവധി ശ്രമിച്ചുവെന്ന് വേണം കോടതിയുടെ തീരുമാനത്തില്‍ നിന്ന് മനസ്സിലാക്കാന്‍. അസിമാനന്ദയുടെ കുറ്റസമ്മത മൊഴി പുറത്തുവരുമ്പോള്‍ ഡോ. മന്‍മോഹന്‍ സിംഗിന്റെ നേതൃത്വത്തില്‍ യു പി എയാണ് അധികാരത്തിലുണ്ടായിരുന്നത്. ഇന്ദ്രേഷിന്റെ പങ്കോ മറ്റ് ഉയര്‍ന്ന ആര്‍ എസ് എസ് നേതാക്കളുടെ പങ്കോ അന്വേഷിക്കാന്‍ അന്നും അന്വേഷണ ഏജന്‍സികള്‍ തയ്യാറായിരുന്നില്ല. അതിലേക്ക് അവരെ നയിക്കാനുള്ള ഇച്ഛാശക്തി ആ ഭരണകൂടം കാട്ടിയതുമില്ല.


സി പി ഐയെ (മാവോയിസ്റ്റ്) അനുകൂലിച്ചു, അക്രമത്തിന് പ്രേരിപ്പിച്ചു, രാജ്യം ഭരിക്കുന്ന സര്‍ക്കാറുകളെ അട്ടിമറിക്കാന്‍ ശ്രമിച്ചു തുടങ്ങിയ കുറ്റങ്ങള്‍ ചെയ്തതായി കണ്ടെത്തിയാണ് വീല്‍ ചെയറില്ലാതെ സഞ്ചരിക്കാന്‍ സാധിക്കാത്ത സായി ബാബയെയും മറ്റ് നാല് പേരെയും ജീവപര്യന്തം തടവിന് ഗാഡ്ചിരോളിയിലെ കോടതി ശിക്ഷിച്ചത്. സായി ബാബയുടെ വീട്ടില്‍ നിന്ന് കണ്ടെടുത്ത മാവോയിസത്തെ അനുകൂലിക്കുന്ന ലഘുലേഖകളാണ് മുഖ്യ തെളിവ്. സി പി ഐ (മാവോയിസ്റ്റ്) നേതാക്കളുടെ കത്തുകളും മറ്റും സായിബാബക്ക് എത്തിച്ചുകൊടുത്തിരുന്നുവെന്ന് രണ്ട് സാക്ഷികള്‍ മൊഴി നല്‍കിയത് കോടതി ഗൗരവത്തില്‍ എടുക്കുകയുംചെയ്തു. രാജ്യത്തിനെതിരെ യുദ്ധം ചെയ്യാന്‍ ആഹ്വാനം ചെയ്താല്‍ പിന്നെ ശിക്ഷിക്കുകയല്ലാതെ മറ്റെന്ത് മാര്‍ഗം!

ഏതെങ്കിലും സ്‌ഫോടനക്കേസില്‍ ആരോപണ വിധേയനല്ല സായി ബാബ, മാവോയിസ്റ്റുകള്‍ നടത്തിയ ഏതെങ്കിലും അക്രമങ്ങള്‍ക്ക് ഒത്താശ ചെയ്തയാളുമല്ല. മാവോയിസ്റ്റ് താവളത്തില്‍ പോയി അക്രമങ്ങള്‍ക്ക് ഗൂഢാലോചന നടത്തിയതായി ആരോപണവുമില്ല. എന്നിട്ടും വിചാരണക്കോടതിയുടെ ന്യായാന്യായ വിചാരത്തില്‍ ജീവപര്യന്തം വിധിക്കാവുന്ന കുറ്റം ചെയ്തതായി കണ്ടെത്തി. അത്യുന്നതമായ നീതിബോധമെന്നല്ലാതെ എന്ത് പറവാന്‍.


അതേ നീതിന്യായ സംവിധാനത്തില്‍ നിന്നാണ് സ്‌ഫോടനം നടത്താന്‍ ഗൂഢാലോചന നടത്തിയെന്ന് കുറ്റസമ്മതമൊഴി മജിസ്‌ട്രേറ്റ് മുമ്പാകെ നല്‍കിയ വ്യക്തി, സംശയാതീതമായ തെളിവുകളുടെ അഭാവത്തില്‍ വിടുതല്‍ ചെയ്യപ്പെടുന്നത്. മാവോയിസ്റ്റ് ബന്ധമാരോപിച്ച കേസില്‍ പഴുതടച്ച തെളിവുകള്‍ ഹാജരാക്കാന്‍ യത്‌നിക്കാനും സാക്ഷികള്‍ പൊലീസിന് നല്‍കിയ മൊഴി കോടതിയില്‍ ആവര്‍ത്തിക്കുന്നുവെന്ന് ഉറപ്പാക്കാനും പൊലീസ് സകല ജാഗ്രതയും കാട്ടിയപ്പോഴാണ് പ്രോസിക്യൂഷന്‍ സാക്ഷികളെ പ്രതിഭാഗം അഭിഭാഷകര്‍ കോടതി മുറിയിലേക്ക് ആനയിക്കുന്നത് എന്‍ ഐ എ നിസ്സംഗമായി കണ്ടുകൊണ്ടിരുന്നത്. രാജ്യത്തെ ഏറ്റവും വലിയ അന്വേഷണ ഏജന്‍സി, തീവ്ര ഹിന്ദുത്വ രാഷ്ട്രീയത്തിന്റെ വിനീത വിധേയരായി മാറിയിരിക്കുന്നുവെന്ന് കരുതണം. അതിനോട് യോജിച്ചുപോകാന്‍ നീതിന്യായ സംവിധാനം തയ്യാറാവുകയാണോ എന്നും.

2017-01-16

പത്മനാഭനും രാധാകൃഷ്ണനാണ്!


ബഹുമുഖങ്ങള്‍, അവയില്‍ നിന്നൊക്കെ ബഹുവിധം സംസാരങ്ങള്‍ - ജനത്തെ സംശയത്തിന്റെ, ആശയക്കുഴപ്പത്തിന്റെ നിഴലിലേക്ക് നീക്കാനും അതുവഴി വെറുപ്പിന്റെ വിത്ത് മുളപ്പിച്ചെടുക്കാനും ഇതില്‍പ്പരം പറ്റിയ ഉപായം മറ്റൊന്നുണ്ടെന്ന് തോന്നുന്നില്ല. അധിനിവേശ - ഫാസിസ്റ്റ് ശക്തികളും വര്‍ഗീയത മാത്രം അജന്‍ഡയാക്കിയവരും എക്കാലവും ഈ മാര്‍ഗം ഉപയോഗിച്ചിട്ടുണ്ട്. ഏകാധിപത്യവും ഏകാധിപത്യത്തിലേക്ക് നീങ്ങുന്ന ഭരണവും ഈ മാര്‍ഗം അവലംബിക്കും. ജനം ഭിന്നിച്ചുനില്‍ക്കുകയും വെറുപ്പിനെ മാത്രം ആധാരമാക്കി ചേരികളുണ്ടാകുകയും ചെയ്യുക എന്നത് ഇക്കൂട്ടരെ സംബന്ധിച്ച് അത്രത്തോളം പ്രധാനമാണ്. ഭൂരിപക്ഷ വര്‍ഗീയതയെ ആളിക്കത്തിച്ച് അധികാരം ഉറപ്പാക്കാന്‍ ശ്രമിക്കുന്നവര്‍, ഇന്ത്യന്‍ യൂനിയനില്‍ ദീര്‍ഘകാലമായി പയറ്റുന്ന തന്ത്രവുമാണിത്.


രാഷ്ട്രീയ സ്വയം സേവക് സംഘിന് മുമ്പ്, സ്വാതന്ത്ര്യ സമരത്തിന് നേതൃത്വം നല്‍കിയിരുന്ന കോണ്‍ഗ്രസില്‍ തീവ്ര, മൃദു നിലപാടുകളെടുത്ത ചേരികളുണ്ടായിരുന്നു. അവ രണ്ടും അടിസ്ഥാനപരമായി ഭൂരിപക്ഷമതവുമായി ചേര്‍ന്നുനില്‍ക്കുന്നതായിരുന്നു. അതിലെ തീവ്ര നിലപാടുകള്‍ ഹിന്ദുത്വ അജന്‍ഡക്കും ആര്‍ എസ് എസ്സിന്റെ രൂപവത്കരണത്തിനും രണ്ട് രാഷ്ട്രമെന്ന വാദത്തിനുമൊക്കെ വഴിമരുന്നിട്ടിട്ടുണ്ട്. തീവ്ര - മൃദു നിലപാടുകള്‍ തമ്മിലുള്ള സംഘര്‍ഷത്തെ അതിനായി വേണ്ടവിധത്തില്‍ ഉപയോഗപ്പെടുത്തുകയും ചെയ്തിട്ടുണ്ട്. സ്വാതന്ത്ര്യാനന്തരം ഈ ദ്വന്ദ്വം ഫലപ്രദമായി ഉപയോഗിക്കപ്പെട്ടത് 1980ല്‍ ഭാരതീയ ജനതാപാര്‍ട്ടിയുടെ രൂപവത്കരണത്തിന് ശേഷമാണ്. 80കളുടെ അവസാനത്തില്‍ രാമക്ഷേത്ര നിര്‍മാണം അജന്‍ഡയായി ഉയര്‍ത്തി എല്‍ കെ അഡ്വാനി രഥയാത്രക്കിറങ്ങിയപ്പോള്‍ ലോഹപുരുഷന്‍ തീവ്ര മുഖവും അടല്‍ ബിഹാരി വാജ്‌പേയി മൃദു മുഖവുമായി വിശേഷിപ്പിക്കപ്പെട്ടു. അത്തരമൊരു നേതൃദ്വയത്തെ സ്ഥാപിച്ചെടുക്കുന്നതില്‍ ദേശീയ മാധ്യമങ്ങള്‍ അവരുടേതായ പങ്ക് വഹിക്കുകയും ചെയ്തു. വര്‍ഗീയ അജന്‍ഡകളില്ലാത്ത പാര്‍ട്ടികളെ സഖ്യത്തിലേക്ക് കൊണ്ടുവരുന്നതിനും മറ്റും മിതമുഖത്തിന്റെ ആവശ്യം അക്കാലത്ത് ബി ജെ പിക്കുണ്ടായിരുന്നു. അത് ഫലം കാണുകയും ചെയ്തു. എന്നാല്‍ ഫലത്തില്‍ തീവ്ര - മൃദു മുഖങ്ങള്‍ പരസ്പര പൂരകങ്ങളായി വര്‍ത്തിക്കുക മാത്രമാണ് ചെയ്തിരുന്നത്. രഥയാത്രയെയോ അതിന്റെ പാര്‍ശ്വങ്ങളില്‍ സംഘടിപ്പിക്കപ്പെട്ട വര്‍ഗീയ അക്രമങ്ങളെയോ ഒരു കാലത്തും വാജ്പയി വിമര്‍ശിച്ചിരുന്നില്ല എന്ന് ഓര്‍ക്കുക.


2002ല്‍ ഗുജറാത്തില്‍ വംശഹത്യാ ശ്രമമുണ്ടായപ്പോള്‍ എ ബി വാജ്പയിയായിരുന്നു പ്രധാനമന്ത്രി. അക്രമം തടയുന്നതിന് സൈന്യത്തെ നിയോഗിക്കണമെന്ന രാഷ്ട്രപതിയായിരുന്ന കെ ആര്‍ നാരായണന്റെ നിര്‍ദേശങ്ങളെ ദിവസങ്ങളോളം തള്ളിക്കളഞ്ഞ്, നരേന്ദ്ര മോദിയുടെ അധ്യക്ഷതയില്‍ സംഘ്പരിവാര സംഘടനകള്‍ ആസൂത്രണം ചെയ്ത പദ്ധതി 'വിജയകര'മായി പൂര്‍ത്തിയാക്കാന്‍ അവസരമൊരുക്കി. പിന്നീട് ദുരിതാശ്വാസ ക്യാമ്പ് സന്ദര്‍ശിച്ച വാജ്പയി 'രാജധര്‍മം' പാലിക്കേണ്ടതിന്റെ ആവശ്യകത ചൂണ്ടിക്കാട്ടി നരേന്ദ്ര മോദിയെ വിമര്‍ശിച്ചുവെന്ന പ്രതീതി ജനിപ്പിച്ച് തീവ്ര നിലപാടുകാര്‍ക്കൊപ്പമല്ല താനെന്ന തോന്നല്‍ ജനിപ്പിക്കുകയും ചെയ്തു. വംശഹത്യാ ശ്രമത്തിനിടെയുണ്ടായ കൊടിയ ക്രൂരതകളുടെ പേരില്‍ കേസുകള്‍ രജിസ്റ്റര്‍ ചെയ്യാന്‍ വൈകിയപ്പോള്‍, രജിസ്റ്റര്‍ ചെയ്ത കേസുകള്‍ ആസൂത്രിതമായി അട്ടിമറിക്കപ്പെട്ടപ്പോള്‍ ഒന്നും മിതവാദ മുഖത്തു നിന്ന് ശബ്ദങ്ങളൊന്നും പുറപ്പെട്ടില്ല. പക്ഷേ, അപ്പോഴും 'രാജധര്‍മം' ഓര്‍മിപ്പിക്കാന്‍ കാണിച്ച ധൈര്യത്തിന്റെ പേരില്‍ ബി ജെ പിയിലെ മിതവാദ മുഖമെന്ന പ്രതിച്ഛായ വാജ്പയിയില്‍ നിലനിന്നു.


ഗുജറാത്ത് 'മാതൃക'യുടെ മേന്മ നിരത്തി ദേശീയ രാഷ്ട്രീയത്തിലേക്ക് നരേന്ദ്ര മോദി ചുവടുറപ്പിച്ചപ്പോള്‍ തീവ്രമുഖമായിരുന്ന എല്‍ കെ അഡ്വാനി മിതത്തിന്റെ മുഖംമൂടി എടുത്തണിയുന്ന കാഴ്ചകണ്ടു. സഖ്യകക്ഷികളുടെ വിശ്വാസമാര്‍ജിക്കണമെങ്കില്‍ ഈ മുഖംമൂടിയില്ലാതെ സാധിക്കില്ലെന്ന തിരിച്ചറിവ്. പ്രധാനമന്ത്രി സ്ഥാനാര്‍ഥി അഡ്വാനിയല്ലെങ്കില്‍ ദേശീയ ജനാധിപത്യ സഖ്യത്തില്‍ നിന്ന് പിന്‍മാറുമെന്ന് ജനതാദള്‍ യുനൈറ്റഡ് നേതാവ് നിതീഷ് കുമാര്‍ പറഞ്ഞിരുന്നത് ഓര്‍ക്കുക. പ്രധാനമന്ത്രിപദമെന്ന സ്വപ്‌നം സാക്ഷാത്കരിക്കാനുള്ള കുറുക്കുവഴിയെന്നതിനപ്പുറത്ത്, അടിസ്ഥാന അജന്‍ഡകളില്‍ നിന്നുള്ള മാറ്റമായി ഈ മുഖംമൂടിയെ കാണാന്‍ സാധിക്കില്ല. അതിനെയൊക്കെ അതിജീവിക്കാനുള്ള ശേഷി നരേന്ദ്ര മോദിയുടെ തീവ്രമുഖത്തിനുണ്ടായിരുന്നതിനാല്‍ വിലപ്പോയില്ലെന്ന് മാത്രം. നരേന്ദ്ര മോദിയെ പരോക്ഷമായി വിമര്‍ശിച്ച് അങ്കത്തിനുള്ള ബാല്യം വിട്ടിട്ടില്ലെന്ന് തെളിയിക്കുമ്പോഴും വര്‍ഗീയ അജന്‍ഡകളില്‍ എന്തെങ്കിലും മാറ്റം അഡ്വാനിക്കുണ്ടായെന്ന് കരുതാനാകില്ല. പല വിധ സംസാരങ്ങളുണ്ടെങ്കിലും ലക്ഷ്യം ഒന്നുതന്നെയെന്ന് ചുരുക്കം.


അസഹിഷ്ണുതയുടെ അന്തരീക്ഷം രാജ്യത്താകെ സൃഷ്ടിക്കപ്പെടുകയും വിമര്‍ശിക്കാനൊരുമ്പെടുന്നവര്‍ രാജ്യം വിട്ടുപോകണമെന്ന് സംഘ്പരിവാര നേതാക്കള്‍ നിരന്തരം പ്രസ്താവനയിറക്കുകയും ചെയ്ത സാഹചര്യത്തിലും കണ്ടത് ഇതേ തന്ത്രമായിരുന്നു. അത്തരം നിലപാടുകളെ പിന്തുണക്കുന്നില്ലെന്ന പ്രസ്താവനയുമായി ചിലര്‍ രംഗത്തുവന്നു. വിദ്വേഷ പ്രസ്താവനകള്‍ നടത്തുന്ന നേതാക്കളെ പ്രധാനമന്ത്രി നരേന്ദ്ര മോദിയും ബി ജെ പി അധ്യക്ഷന്‍ അമിത് ഷായും വിളിച്ചുവരുത്തി ഉപദേശിച്ചുവെന്നോ ശാസിച്ചുവെന്നോ ഒക്കെയുള്ള റിപ്പോര്‍ട്ടുകള്‍ പുറത്തുവന്നു. അസഹിഷ്ണുതയുടെ അന്തരീക്ഷത്തെ രാഷ്ട്രപതി പലകുറി വിമര്‍ശിച്ച ശേഷം, രാഷ്ട്രപതി പറഞ്ഞതില്‍ കഴമ്പുണ്ടെന്ന വാദവുമായി നരേന്ദ്ര മോദി തന്നെ രംഗത്തുവന്നു. ഭൂരിപക്ഷ മതത്തിന്റേത് എന്ന് സംഘ്പരിവാരം വ്യാഖ്യാനിക്കുന്ന കാര്യങ്ങളൊക്കെ രാജ്യത്തിന് ഗുണകരമാണ് എന്ന് സ്ഥാപിക്കാന്‍ ശ്രമിക്കുകയും അതിന് പരമാവധി പ്രചാരം നല്‍കുകയും ചെയ്ത്, അവകളെ പിന്തുണക്കുന്നതല്ലേ രാജ്യസ്‌നേഹമെന്ന സംശയം ജനത്തില്‍ ഉണര്‍ത്തി, വിമര്‍ശമുന്നയിക്കുന്നവരെയൊക്കെ രാജ്യദ്രോഹികളായി കാണേണ്ടതല്ലേ എന്ന തോന്നല്‍ ജനിപ്പിച്ച്, അതിനുശേഷമൊരു മിതവാദം. ഭരണഘടന വാഗ്ദാനം ചെയ്യുന്ന അവകാശങ്ങളെ സംരക്ഷിക്കുന്ന, ബഹുസ്വരതയുടെ സംരക്ഷണത്തിന് പ്രതിജ്ഞാബദ്ധരായ, ഉത്തരവാദിത്തമുള്ള പാര്‍ട്ടിയും ഭരണകൂടവുമാണ് തങ്ങളെന്ന മിതസ്വരം.


ഈ തന്ത്രങ്ങളുടെ കേരളപ്പതിപ്പ് അരങ്ങേറിക്കൊണ്ടിരിക്കുകയാണ്. കുമ്മനം രാജശേഖരന്‍ ബി ജെ പിയുടെ സംസ്ഥാന പ്രസിഡന്റായി ചുമതലയേല്‍ക്കുകയും കേന്ദ്ര നേതൃത്വം (അമിത് ഷായെന്ന് പറയുന്നതാകും കൂടുതല്‍ ശരി) കേരളത്തിലെ കാര്യങ്ങളില്‍ കൂടുതലായി ഇടപെടുകയും ചെയ്യാന്‍ തുടങ്ങിയതോടെയാണ് ഇത് ഊര്‍ജിതമായത്. ഉത്തര്‍ പ്രദേശില്‍ പയറ്റിയ 'ലവ് ജിഹാദ്' ആരോപണം ആദ്യം മുളപൊട്ടിയത് കര്‍ണാടകത്തിലും കേരളത്തിലുമായിരുന്നു. അതിന്‍മേല്‍ കാറ്റുപടര്‍ത്താനുള്ള ശ്രമങ്ങള്‍ അന്ന് കേരളത്തില്‍ വിലപ്പോയില്ല, കേരള കാത്തലിക് ബിഷപ്‌സ് കോണ്‍ഫറന്‍സിന്റെയും വെള്ളാപ്പള്ളി നടേശന്റെയും പിന്തുണയുണ്ടായിരുന്നിട്ട് കൂടി. ആ സാഹചര്യമല്ല ഇപ്പോഴെന്ന്, നിയമസഭാ തിരഞ്ഞെടുപ്പില്‍ ലഭിച്ച അധിക വോട്ടുകള്‍ കണക്കിലെടുത്ത് കേന്ദ്ര നേതൃത്വവും ആര്‍ എസ് എസ്സും വിലയിരുത്തുന്നുണ്ട്. അതുകൊണ്ടാണ് വെറുപ്പിന്റെ വിത്തിറക്കാനുള്ള ശ്രമം പരസ്യമായി തന്നെ നടത്താന്‍ ബി ജെ പിയുടെ ഒരു വിഭാഗം നേതാക്കള്‍ വീണ്ടും ശ്രമം തുടങ്ങിയത്.


നോട്ട് പിന്‍വലിച്ച നടപടിയെ വിമര്‍ശിച്ച എം ടി വാസുദേവന്‍ നായര്‍ക്കെതിരെയും സിനിമാ ഹാളുകളില്‍ ദേശീയഗാനം നിര്‍ബന്ധമാക്കിയ സുപ്രീം കോടതി വിധി മറയാക്കി സംവിധായകന്‍ കമലിനെതിരെയും സംഘ്പരിവാരത്തിലെ ഒരു വിഭാഗം അഴിച്ചുവിടുന്ന ആക്രമണം ഈ ശ്രമങ്ങളുടെ ഭാഗമാണ്. രാജ്യ പുരോഗതി ലാക്കാക്കി 'മഹാനായ' ഭരണാധികാരി അനുഷ്ഠിച്ച കര്‍മത്തെ വിമര്‍ശിക്കുന്ന സാഹിത്യകാരന്‍, ദേശീയത ഊട്ടിയുറപ്പിക്കുന്നതിനായി സുപ്രീം കോടതി പുറപ്പെടുവിച്ച ഉത്തരവിനെ മാനിക്കാന്‍ വിസമ്മതം കാട്ടുന്ന മുസ്‌ലിമായ സംവിധായകന്‍. ഇവര്‍ക്കു നേരെ നടത്തുന്ന ആക്രമണം സാമാന്യജനങ്ങള്‍ക്കിടയില്‍ ചേരിതിരിവുണ്ടാക്കുമെന്ന തിരിച്ചറിവ് സംഘ്പരിവാരത്തിനുണ്ട്. ഈ ആക്രമണത്തെ പ്രതിരോധിക്കാന്‍ നടത്തുന്ന ശ്രമങ്ങളെയൊക്കെ രാജ്യസ്‌നേഹത്തിന്റെ കോലുകൊണ്ട് അളക്കാമെന്നും. ഇതിനെ പ്രതിരോധിക്കാനുയരുന്ന വാദങ്ങളൊക്കെ പരോക്ഷമായി (കപട) രാജ്യസ്‌നേഹത്തിന്റെയും (വ്യാജ) ദേശീയതയുടെയും പ്രചാരണത്തിന് ഉപയുക്തമാകുമെന്ന ബോധ്യം സംഘ്പരിവാരത്തിനുണ്ട്. സ്വന്തം പാളയത്തില്‍ നിന്ന് തന്നെ വിമര്‍ശമുയരുക കൂടി ചെയ്താല്‍ പ്രചാരണത്തിന് കൊഴുപ്പ് കൂടും. അങ്ങനെ വിമര്‍ശിക്കപ്പെടുമ്പോള്‍, ആദ്യമുന്നയിച്ച ആരോപണങ്ങള്‍ കൂടുതല്‍ ആഴത്തില്‍ വിശകലനം ചെയ്യപ്പെടുമെന്ന പ്രതീക്ഷ.


മതനിരപേക്ഷ നിലപാടുകള്‍ പിന്തുടരുന്ന രാഷ്ട്രീയ പാര്‍ട്ടികള്‍ നയങ്ങളുടെയും നിലപാടുകളുടെയും അടിസ്ഥാനത്തില്‍ നടത്തുന്ന വാഗ്വാദങ്ങളെപ്പോലെയല്ല ഇത്. അതില്‍ ഏത് ഭാഗത്തിന് പ്രാമുഖ്യം ലഭിച്ചാലും സമൂഹത്തില്‍ വെറുപ്പിന്റെയോ വിദ്വേഷത്തിന്റെയോ വിത്തുകള്‍ മുളപ്പിക്കുന്നില്ല. ആരോപണങ്ങള്‍ ഉന്നയിക്കുമ്പോഴും അതിനെ പ്രതിരോധിക്കുമ്പോഴും വര്‍ഗീയവികാരം സൃഷ്ടിക്കാന്‍ പാകത്തിലുള്ള രണ്ട് തലയുള്ള വാളാണ് ഇപ്പോള്‍ പ്രയോഗിക്കപ്പെടുന്നത്. അതിന്റെ ആഘാതം മനസ്സിലാകാത്തതുകൊണ്ടാണ് ബി ജെ പിയുടെ സംസ്ഥാന ജനറല്‍ സെക്രട്ടറി മാത്രമായ എ എന്‍ രാധാകൃഷ്ണന്റെ വാക്കുകള്‍ക്ക് വലിയ പ്രാമുഖ്യം ലഭിക്കുന്നത്. ആ വാക്കുകളിലെ വസ്തുതാപരമായ തെറ്റുകളോ ചരിത്ര നിഷേധമോ ഒന്നും വിഷയമാകാതെ ആഘോഷിക്കപ്പെടുന്നത്. ബി ജെ പിയുടെ സംസ്ഥാന പ്രസിഡന്റായിരുന്ന കാലത്തിന് ശേഷം തിരുവനന്തപുരം ലോക്‌സഭാ സീറ്റിലെ ഉപതിരഞ്ഞെടുപ്പില്‍ ദയനീയ പരാജയം ഏറ്റുവാങ്ങിയപ്പോള്‍ മാത്രം പ്രാമുഖ്യം ലഭിച്ച സി കെ പത്മനാഭന്റെ വിമര്‍ശം വലിയ വാര്‍ത്തയാകുന്നത്. നമ്മുടെ സാമൂഹിക ഘടനയില്‍ സ്വാധീനമുറപ്പിച്ച വ്യക്തിത്വങ്ങളെ വിമര്‍ശിക്കാനും  വിമര്‍ശത്തെ പ്രതിരോധിക്കാനും അര്‍ഹതയുള്ളവരാണോ അത് ചെയ്യുന്നത് എന്ന ന്യായമായ ചോദ്യം സ്വയം ഉന്നയിക്കേണ്ട കാലം കൂടിയാണ് ഇന്നത്തേത്. അതുണ്ടായില്ലെങ്കില്‍ വെറുപ്പിന്റെ വിത്തിറക്കാനുള്ള പ്രചാരണങ്ങളില്‍ അറിഞ്ഞോ അറിയാതെയോ പങ്കാളികളാകുകയാകും ഫലം.


ഫലശൂന്യമായ തര്‍ക്കങ്ങള്‍ വാര്‍ത്താ വിസ്‌ഫോടനമായി കണക്കാക്കപ്പെടുന്ന കാലത്ത്, ഇതും ആ ഗണത്തില്‍ ഇരിക്കട്ടെ എന്ന ചിന്ത അത്ര നിഷ്‌കളങ്കമല്ല തന്നെ. വലിയ അക്ഷരങ്ങളില്‍ മിന്നിമറയുന്ന വാര്‍ത്തക്കപ്പുറത്ത് എ എന്‍ രാധാകൃഷ്ണനെയും സി കെ പത്മനാഭനെയും നിയന്ത്രിക്കുന്ന അജന്‍ഡകളുണ്ട്. ആ അജന്‍ഡകളെ കൃത്യമായി വിക്ഷേപിക്കുന്ന ശക്തികളുമുണ്ട്. തീവ്ര - മിത ദ്വയത്തെ നിര്‍വചിച്ച് സംഘ് അജന്‍ഡകള്‍ക്ക് അധികാരത്തില്‍ ഇടം നല്‍കിയ ചരിത്രം അത്ര അകലെയുള്ളതല്ല. ഒരേ അജന്‍ഡയില്‍ വേരൂന്നി പലവിധത്തില്‍ സംസാരിക്കുന്നവര്‍ക്ക് പല ലക്ഷ്യങ്ങളില്ലെന്ന മനസ്സിലാക്കലും പ്രധാനമാണ്.

2017-01-03

ചില 'രാജ്യദ്രോഹ' വിചാരങ്ങള്‍


130 കോടി ജനങ്ങളെ, അസാധു നോട്ടുകള്‍ കൈവശംവെക്കുന്ന കുറ്റവാളികളായി ചിത്രീകരിച്ച്, അസാധുവാക്കിയ നോട്ടുകള്‍ ഇനിയും കൈവശംവെച്ചാല്‍ പിഴചുമത്തുമെന്ന് ഭീഷണിപ്പെടുത്തി ബേങ്കുകളിലേക്ക് തിരിച്ചെത്തിച്ച ശേഷം ഇതാ ബേങ്കുകളൊക്കെ പണം കൊണ്ട് നിറഞ്ഞിരിക്കുന്നു, ഇത്ര ചെറിയകാലം കൊണ്ട് ഖജാന നിറയുന്നത് ലോക ചരിത്രത്തിലെവിടെയെങ്കിലും കണ്ടിട്ടുണ്ടോ എന്ന് ചോദിക്കുന്ന ഭരണാധികാരിയെ വിഡ്ഢി എന്നോ ജനദ്രോഹി എന്ന് വിശേഷിപ്പിച്ചാല്‍ ഇന്ത്യന്‍ യൂനിയനില്‍ നിലനില്‍ക്കുന്ന സാഹചര്യത്തില്‍ അതൊരുപക്ഷേ, 'രാജ്യദ്രോഹ'മായി ചിത്രീകരിക്കപ്പെട്ടേക്കാം. പക്ഷേ, ആ 'രാജ്യദ്രോഹം' അനുഷ്ഠിക്കാതെ നിവൃത്തിയില്ലാത്ത അവസ്ഥ നിലനില്‍ക്കുന്നുവെന്നത് കാണാതിരിക്കാനും സാധിക്കില്ല.


ജനം അധ്വാനിച്ചുണ്ടാക്കിയ സമ്പത്ത് യാതൊരു മുന്നറിയിപ്പും കൂടാതെ ഭരണ കൂടം പിടിച്ചെടുക്കുന്ന കാഴ്ചയാണ് നവംബര്‍ എട്ടിന് രാത്രി കണ്ടത്.  പിടിച്ചെടുത്ത സമ്പത്തിന്‍മേലുള്ള പൂര്‍ണാധികാരം എന്ന് ജനത്തിന് തിരിച്ചുനല്‍കുമെന്ന് പറയാന്‍ ഭരണാധികാരിക്ക് സാധിക്കുന്നില്ല. അതേ ഭരണാധികാരിയാണ് ബേങ്കുകളൊക്കെ പണം കൊണ്ട് നിറഞ്ഞിരിക്കുന്നുവെന്നും അതിന്റെ പ്രയോജനം ജനങ്ങള്‍ക്ക് ലഭിക്കുമെന്നും അവകാശപ്പെടുന്നത്. ഇതിലെ വൈരുധ്യം സ്വയം മനസ്സിലാക്കാനുള്ള ബുദ്ധിപോലുമില്ലാത്തയാളിന്റെ കാര്യത്തില്‍ 'രാജ്യദ്രോഹം' അനുഷ്ഠിക്കാതെ നിവൃത്തിയില്ല.


പിടിച്ചെടുത്ത സമ്പത്തിന്‍മേലുള്ള പൂര്‍ണാധികാരം ജനങ്ങള്‍ക്ക് തിരികെ നല്‍കിക്കഴിഞ്ഞാല്‍, ബേങ്കുകളിലേക്ക് എത്തിയ പണത്തില്‍ ഭൂരിഭാഗവും വിപണിയിലേക്ക് ഒഴുകും. നിറഞ്ഞ ഖജാന ഒഴിയുമെന്ന് ചുരുക്കം. അങ്ങനെ ഒഴിയാനുള്ള സാധ്യത നിലനില്‍ക്കെ, ഇതാ ഖജാന നിറഞ്ഞിരിക്കുന്നു, അതിന്റെ ഗുണം നിങ്ങള്‍ക്ക് കിട്ടുമെന്നൊക്കെ വിശ്വസിച്ച് പുതിയതെന്ന് ജനത്തിന് തോന്നാവുന്ന പദ്ധതികള്‍ പ്രഖ്യാപിക്കുന്ന ഭരണാധികാരിയെക്കുറിച്ച് ചിന്തിക്കുമ്പോഴും 'രാജ്യദ്രോഹം' മാത്രമേ അനുഷ്ഠിക്കാനാകൂ.


ജനത്തിന്റെ സമ്പത്ത് പിടിച്ചെടുത്ത നവംബര്‍ എട്ടിന് രാത്രി, ഭരണാധികാരി വാചാലനായത് കള്ളപ്പണത്തെക്കിറിച്ച്, കള്ള നോട്ടിനെക്കുറിച്ച്, അഴിമതിയെക്കുറിച്ച്, ഭീകരവാദത്തിന് ലഭിക്കുന്ന സാമ്പത്തിക സഹായത്തെക്കുറിച്ച് ഒക്കെയായിരുന്നു. ഇതൊക്കെ തടയാനുള്ള മാന്ത്രിക വിദ്യയാണ് ഈ പിടിച്ചെടുക്കല്‍ എന്നായിരുന്നു പ്രഖ്യാപനം. അസാധുവാക്കിയ 15.44 ലക്ഷം കോടിയില്‍ മൂന്ന് മുതല്‍ നാല് വരെ ലക്ഷം കോടി ബേങ്കുകളിലേക്ക് തിരിച്ചെത്താതിരിക്കുമെന്നും അതൊക്കെ കള്ളപ്പണമായിരുന്നുവെന്ന് അവകാശപ്പെടാന്‍ സാധിക്കുമെന്നുമായിരുന്നു പ്രതീക്ഷ. അസാധുവാക്കിയതില്‍ 14 ലക്ഷം കോടിയിലേറെ ഇതിനകം തിരിച്ചെത്തിക്കഴിഞ്ഞു. പ്രവാസ ജീവിതം നയിക്കുന്ന ഇന്ത്യക്കാര്‍ കൈവശം വെച്ചിരിക്കുന്ന നോട്ടുകള്‍, നാട്ടിലുള്ളവര്‍ തന്നെ ഇനിയും ബേങ്കുകളിലേക്ക് എത്തിക്കാത്ത നോട്ടുകള്‍ ഒക്കെ പരിഗണിച്ചാല്‍ 95 ശതമാനത്തിലധികം തിരിച്ചെത്തുമെന്ന് കരുതണം. 100 ശതമാനവും തിരിച്ചെത്തുമെന്നാണ് കേന്ദ്ര റവന്യൂ സെക്രട്ടറി നേരത്തെ പറഞ്ഞിരുന്നത്. എന്തായാലും  സമ്പദ് വ്യവസ്ഥയില്‍ നിന്ന് ലക്ഷക്കണക്കിന് കോടിയുടെ കള്ളപ്പണം ഇല്ലാതാക്കാന്‍ സാധിച്ചുവെന്ന പ്രഖ്യാപനത്തിന് അരയും തലയും മുറുക്കി കാത്തിരുന്ന ഭരണാധികാരി, നിരാശനായെന്ന് ചുരുക്കം. ആ നിരാശ, പുതുവര്‍ഷത്തലേന്ന് രാജ്യത്തെ അഭിസംബോധന ചെയ്തപ്പോള്‍ പ്രകടവുമായിരുന്നു.


500, 1000 നോട്ടുകള്‍ അസാധുവാക്കിയതോടെ ആ ശ്രേണിയിലുള്ള കള്ള നോട്ടുകള്‍ അപ്രത്യക്ഷമായിട്ടുണ്ടാകുമെന്ന് ഉറപ്പ്. രാജ്യത്ത് വ്യവഹരിക്കപ്പെടുന്ന കള്ളനോട്ട് റിസര്‍വ് ബേങ്ക് ഓഫ് ഇന്ത്യയുടെ 2015 - 16 വര്‍ഷത്തെ കണക്കനുസരിച്ച് 29.64 കോടി മാത്രമാണ്. ആകെ വിപണിയിലുള്ള (ഉണ്ടായിരുന്ന) 16.41 ലക്ഷം കോടിയുടെ 0,0018 ശതമാനം മാത്രം. ആ കാറ്റാടിയോടുള്ള യുദ്ധം എത്രമാത്രം വിജയിച്ചുവെന്ന് പുതിയ പ്രഭാഷണത്തില്‍ ഡോണ്‍ ക്വിക്‌സോട്ട് പറഞ്ഞിട്ടില്ല. അസാധുവാക്കിയതിന്റെ വ്യാജനുമായി വിഹരിക്കാന്‍ മാത്രം വിഡ്ഢിത്തം കള്ളനോട്ട് അച്ചടിക്കുന്നവര്‍ കാണിക്കില്ല. പുതുതായി വിപണിയിലെത്തിച്ചതിന്റെ വ്യാജനിറക്കാനാകുമോ എന്ന ഗവേഷണത്തിലായിരിക്കുമല്ലോ അക്കൂട്ടര്‍.


അഞ്ഞൂറ്, ആയിരം നോട്ടുകള്‍ ഇല്ലാതായതോടെ ഭീകരവാദത്തിന്റെ നടുവൊടിഞ്ഞുവെന്നാണ് മറ്റൊരു അവകാശവാദം. ഭീകരവാദികള്‍ക്ക് ഇന്ത്യന്‍ രൂപ തന്നെ വേണമെന്ന നിര്‍ബന്ധമില്ലെന്ന് അതിന്റെ ശൃംഖലകളെക്കുറിച്ച് അറിയാവുന്നവര്‍ക്കൊക്കെ അറിയാം. അവര്‍ക്ക് ആയുധങ്ങള്‍ കിട്ടുന്ന വഴിക്ക് രാജ്യാതിര്‍ത്തികള്‍ ബാധകമല്ലെന്നും. അതുകൊണ്ട് തന്നെ നോട്ട് അസാധുവാക്കല്‍ ഭീകരവാദത്തിന്റെ നട്ടെല്ലൊടിച്ചുവെന്നൊക്കെ പറയുന്നതിലെ വിഡ്ഢിത്തം ചെറുതല്ല തന്നെ.


നോട്ട് പിന്‍വലിച്ചതിന്റെ അമ്പത് ദിവസം പൂര്‍ത്തിയാകുമ്പോള്‍ വലിയ പ്രഖ്യാപനങ്ങളുണ്ടാകുമെന്നാണ് പൊതുവില്‍ പ്രചരിച്ചിരുന്നത്. നികുതി കുറയണം, കൂടുതല്‍ പേര്‍ നികുതി നല്‍കുന്നവരായി മാറണം എന്നതാണ് സമ്പദ് വ്യവസ്ഥക്ക് ഗുണകരമെന്ന് ധനമന്ത്രി അരുണ്‍ ജെയ്റ്റ്‌ലി പറയുക കൂടി ചെയ്തതോടെ പ്രഖ്യാപനങ്ങളെക്കുറിച്ചുള്ള പ്രതീക്ഷകള്‍ വര്‍ധിച്ചു. ഒന്നും സംഭവിച്ചില്ല. നഗരങ്ങളിലെ ഇടത്തരക്കാര്‍ വീടുവെക്കുന്നതിന് വായ്പയെടുത്താല്‍ ഒമ്പത് ലക്ഷത്തിന് നാല് ശതമാനവും 12 ലക്ഷത്തിന് മൂന്ന് ശതമാനവും പലിശയിളവുണ്ടാകുമെന്നതാണ് 'വലിയ' പ്രഖ്യാപനങ്ങളിലൊന്ന്. നഗര മേഖലയിലെ പാവപ്പെട്ടവര്‍ക്ക് വീടുവെക്കുന്നതിനും മറ്റും കേന്ദ്ര - സംസ്ഥാന സര്‍ക്കാറുകള്‍ ഇപ്പോള്‍ തന്നെ ഗ്രാന്റുകള്‍ നല്‍കുന്നുണ്ട്. അതിന്റെ കൂടെച്ചേരുന്നതാണോ ഈ പലിശയിളവ് എന്നത് വരുംകാലത്തേ വ്യക്തമാകൂ.


2017ല്‍ വായ്പയെടുക്കുന്നവര്‍ക്കേ ആനുകൂല്യമുള്ളൂ. നോട്ട് പിന്‍വലിച്ചതിനെത്തുടര്‍ന്ന് തളര്‍ന്ന ചെറുകിട - ഇടത്തരം വ്യവസായ, വാണിജ്യ മേഖലകളില്‍ നിന്നുള്ളവരാകും ഈ വായ്പയുടെ ഉപഭോക്താക്കള്‍. പ്രതിസന്ധി തുടരുന്നതിനാല്‍, ഈ ഗണത്തില്‍പ്പെട്ട എത്രപേര്‍ 2017ല്‍ വീടുവെക്കാന്‍ ശ്രമിക്കും? ഈ പ്രഖ്യാപനം പ്രയോജനം ചെയ്യാനുള്ള സാധ്യത കുറവ്. ഗ്രാമീണ മേഖലയില്‍ വീടുവെക്കുന്നതിന് രണ്ട് ലക്ഷം രൂപവരെ വായ്പയെടുക്കുന്നവര്‍ക്കുമുണ്ട് മൂന്ന് ശതമാനം പലിശയിളവ്. നോട്ട് പിന്‍വലിക്കല്‍ മൂലം തകര്‍ന്ന ഗ്രാമീണ മേഖലയിലുള്ളവരില്‍ എത്രപേര്‍ 2017ല്‍ വീടുവെക്കാന്‍ ശ്രമിക്കും? രണ്ട് ലക്ഷം വരെയുള്ള വായ്പകൊണ്ട് ഗ്രാമങ്ങളിലുള്ളവര്‍ക്ക് വീടുവെക്കാനാകുമെന്ന് പ്രധാനമന്ത്രി ഇപ്പോഴും കരുതുന്നുവെങ്കില്‍, അതേക്കുറിച്ച് പിന്നെ എന്തെങ്കിലും പറയുന്നതില്‍ അര്‍ഥമില്ല.


സര്‍ക്കാര്‍ ആശുപത്രികളെ ആശ്രയിക്കുന്ന ഗര്‍ഭിണികള്‍ക്ക് ആറായിരം രൂപയുടെ ധനസഹായമാണ് അടുത്തത്. 2013ല്‍ പാര്‍ലിമെന്റ് പാസ്സാക്കിയ ഭക്ഷ്യസുരക്ഷാ നിയമത്തില്‍ ഇത് വ്യവസ്ഥ ചെയ്തിരുന്നു. അത് നടപ്പാക്കുക മാത്രമേ ഈ പ്രഖ്യാപനത്തിലുള്ളൂ. പാര്‍ലിമെന്റ് പാസ്സാക്കിയ നിയമത്തിലെ വ്യവസ്ഥ എന്തുകൊണ്ട് ഇത്രകാലം നടപ്പാക്കിയില്ല എന്ന ചോദ്യത്തിനുള്ള മറുപടി കൂടി പ്രധാനമന്ത്രി നരേന്ദ്ര മോദി നല്‍കണമായിരുന്നു. സൂക്ഷ്മ - ചെറുകിട - ഇടത്തരം വ്യവസായങ്ങള്‍ക്ക് ബേങ്കുകള്‍ നല്‍കുന്ന ഒരു കോടി രൂപവരെയുള്ള വായ്പകള്‍ക്ക് സര്‍ക്കാര്‍ ഗ്യാരണ്ടി നില്‍ക്കുന്നുണ്ട്. ഇത് രണ്ട് കോടിയായി ഉയര്‍ത്തി. ബാങ്കിതര ധനകാര്യ സ്ഥാപനങ്ങളില്‍ നിന്നെടുക്കുന്ന വായ്പകള്‍ക്കും സര്‍ക്കാര്‍ ഗ്യാരണ്ടി നില്‍ക്കും. നോട്ട് പിന്‍വലിച്ചതോടെ പ്രതിസന്ധിയിലാകുകയോ പ്രവര്‍ത്തനം നിര്‍ത്തുകയോ ചെയ്ത ഇത്തരം വ്യവസായ സ്ഥാപനങ്ങള്‍, നിലനില്‍പ്പിന് വേണ്ടി ശ്രമിക്കുമോ അതോ പുതിയ വായ്പയെടുത്ത് കടം വര്‍ധിപ്പിക്കാന്‍ യത്‌നിക്കുമോ?


പിന്നെയുള്ളത് കറന്‍സിരഹിത സമൂഹത്തിലേക്കുള്ള വിപ്ലവകരമായ മാറ്റത്തിലേക്കുള്ള അവകാശവാദമാണ്. കൈയില്‍ നോട്ടില്ലാതായതോടെ ജനസംഖ്യയില്‍ ചെറുതല്ലാത്ത വിഭാഗം അതിലേക്ക് മാറിയിട്ടുണ്ട് എന്നത് വസ്തുതയാണ്. രാജ്യമാകെ അതിലേക്ക് മാറാന്‍ പാകത്തിലുള്ള അടിസ്ഥാന സൗകര്യം ഇല്ലെന്നിരിക്കെ, ഓണ്‍ലൈന്‍ ഇടപാടുകള്‍ സുരക്ഷിതമാക്കുന്നതിന് വേണ്ട സംവിധാനം ഇല്ലെന്നിരിക്കെ ഈ അവകാശവാദത്തെയും മുഖവിലക്കെടുക്കാനാകില്ല. ഓണ്‍ലൈന്‍ ഇടപാടുകള്‍ വ്യാപകമായ അമേരിക്കയില്‍ ഇപ്പോഴും 45 ശതമാനം കറന്‍സിയിലാണ് ക്രയവിക്രയം. ബ്രിട്ടനിലെ സ്ഥിതിയും ഭിന്നമല്ല. ഓണ്‍ലൈന്‍ ഇടപാടുകള്‍ നടത്തുന്നവരെ പറ്റിച്ച് പണം തട്ടുന്ന സംഭവങ്ങള്‍ ഓരോ വര്‍ഷവും വര്‍ധിച്ചുവരുന്നതായാണ് ബ്രിട്ടനിലെ ഔദ്യോഗിക ഏജന്‍സികള്‍ തന്നെ പറയുന്നത്. അതില്‍ തന്നെ കൂടുതല്‍ നടക്കുന്നത്, ഫോണില്‍ വിളിച്ച്, വിവരങ്ങള്‍ ചോദിച്ചറിഞ്ഞ് നടത്തുന്ന തട്ടിപ്പുകളാണ്. അത്തരം സംഗതികള്‍ കറന്‍സി രഹിത സമൂഹത്തിലേക്കുള്ള വിപ്ലവം ആരംഭിക്കുന്നതിന് മുമ്പ് തന്നെ ഇന്ത്യാ മഹാരാജ്യത്ത് നടക്കുന്നുണ്ട്. അക്ഷരമറിയാത്ത, ഇത്തരം തട്ടിപ്പുകള്‍ നടക്കുന്നുണ്ടെന്നും അതിന് താനും ഇരയാകാമെന്നും അറിയാത്ത കോടിക്കണക്കിന് ആളുകളുള്ള രാജ്യത്ത് മൊബൈല്‍ ഫോണ്‍ ബേങ്കായി മാറുമ്പോള്‍ എന്തൊക്കെ സംഭവിക്കുമെന്ന് കണ്ടറിയണം.


ആധാര്‍ ബന്ധിതമായ ഓണ്‍ലൈന്‍ ഇടപാടുകള്‍ വ്യാപിപ്പിക്കാനാണ് നരേന്ദ്ര മോദി സര്‍ക്കാര്‍ ആലോചിക്കുന്നത്. ആധാര്‍ വിവരങ്ങള്‍ ഇതിനകം തന്നെ റിലയന്‍സ് അടക്കമുള്ള കമ്പനികളുടെയൊക്കെ പക്കലുണ്ട്. വ്യക്തി വിവരങ്ങളൊക്കെ ചോര്‍ന്ന അവസ്ഥയിലാണ് ആധാര്‍ സ്വന്തമായുള്ള ആളുകള്‍. അതുകൊണ്ട് തന്നെ കൂടുതല്‍ പേര്‍ കബളിപ്പിക്കപ്പെടാനുള്ള സാധ്യത നിലനില്‍ക്കുന്നു. ഉപഭോക്താക്കളുടെ അറിവില്ലാതെ സംഭവിക്കുന്ന തട്ടിപ്പുകള്‍ക്ക് ബേങ്കുകള്‍ക്ക് ഉത്തരവാദിത്തമുണ്ട്. അവ്വിധം നഷ്ടമാകുന്ന പണം ഒരുപക്ഷേ, അവര്‍ തിരികെ കൊടുത്തേക്കാം. ഉപഭോക്താക്കളെ കബളിപ്പിച്ച് വിവരങ്ങളെടുത്ത് നടത്തുന്ന തട്ടിപ്പുകളാണെങ്കില്‍, അതിലൂടെയുണ്ടാകുന്ന നഷ്ടത്തിന് ബേങ്ക് ഉത്തരവാദിയാകില്ല. നിലവില്‍ തന്നെ പലവിധ ചൂഷണങ്ങള്‍ കൊണ്ട് പൊറുതിമുട്ടി നില്‍ക്കുന്ന വലിയൊരു വിഭാഗം ജനതയെ സംഘടിത തട്ടിപ്പിന്റെ സാധ്യതയിലേക്ക് കൂടി എറിഞ്ഞുകൊടുക്കുകയാണോ നരേന്ദ്ര മോദി സര്‍ക്കാര്‍ എന്ന് ന്യായമായും സംശയിക്കണം.


ജനങ്ങളുടെ സമ്പത്ത് പിടിച്ചെടുത്ത്, കള്ളപ്പണത്തിനും അഴിമതിക്കുമെതിരായ യുദ്ധമെന്ന് പ്രഖ്യാപിച്ച്, ശൂന്യമായ കൈകളുമായി നില്‍ക്കുകയാണ് ഭരണാധികാരി. രാജ്യത്തെ രക്ഷിക്കാനായി താന്‍ നടത്തിയ ശ്രമത്തെ പിന്തുണച്ച ജനങ്ങള്‍ക്ക് നന്ദി പറഞ്ഞും സത്യസന്ധരായ ആളുകള്‍ക്കുണ്ടായ ബുദ്ധിമുട്ടുകളില്‍ ഖേദം രേഖപ്പെടുത്തിയും വാചാടോപത്തിലൂടെ വികാരമുണര്‍ത്താനുള്ള പുതിയ തന്ത്രങ്ങള്‍ പയറ്റുന്നു.  വിഡ്ഢിത്തം അകമ്പടി പോകുന്ന ഈ വാചാടോപത്തിന്റെ നെല്ലും പതിരും തിരിഞ്ഞു തുടങ്ങിയിരിക്കുന്നുവെന്നതാണ് നോട്ട് പിന്‍വലിച്ച നടപടിയുടെ ഏറ്റവും വലിയ ഗുണഫലം. അത് ശബ്ദഘോഷങ്ങളാല്‍ പ്രകടിപ്പിക്കപ്പെടുന്നില്ലെന്ന് മാത്രം. അടിയന്തരാവസ്ഥക്കാലത്തുയര്‍ന്ന പ്രതിഷേധങ്ങള്‍ക്കും ശബ്ദഘോഷങ്ങളുടെ അകമ്പടിയുണ്ടായിരുന്നില്ലല്ലോ!